Svipmyndir úr Reykhólaskóla
Starfið í Reykhólaskóla er komið í fullan gang eins og nærri má geta. Skólinn var settur föstudaginn 22. ágúst og kennsla samkvæmt stundaskrá hófst þá eftir helgina. Skólastarfið er með hefðbundnum hætti að öðru leyti en því að skólinn hefst kl. 8:30 í stað kl. 9:00 eins og verið hefur. „Í vetur verða áfram hinir frábæru kennarar sem hafa verið undanfarin ár, Ásta Sjöfn, Áslaug, Kolfinna, Lóa og Rebekka, auk Stefáns sem kemur nýr inn", segir nýi skólastjórinn, Júlía Guðjónsdóttir. Stefán er krökkunum að vísu ekki ókunnur þar sem hann hefur verið hér nokkur sumur með leikjanámskeið.
Nemendur í Reykhólaskóla í vetur eru 34 talsins eins og nú horfir eða heldur fleiri en voru í fyrra. Hér fylgja nokkrar svipmyndir frá upphafi skólastarfsins sem vefurinn fékk sendar en mun fleiri er að finna undir Ljósmyndir > Myndasyrpur > Skólabyrjun 2008 í valmyndinni hér vinstra megin á síðunni.