Systkinin frá Gilsfjarðarmúla eru samtals 882 ára
„Í systkinahópnum bera þrír nafnið Halldór, einn að millinafni, og tveir nafnið Guðjón,“ segir í frétt á baksíðu Morgunblaðsins í dag undir fyrirsögninni Systkinin samtals 882 ára. Þar er greint frá systkinunum ellefu frá Gilsfjarðarmúla í núverandi Reykhólahreppi. Af þeim eru tveir bræður enn búsettir í héraðinu, þeir Halldór D. Gunnarsson (Venni) í Króksfjarðarnesi og Guðjón D. Gunnarsson (Dalli) á Reykhólum. Einnig segir þar:
„Á dögunum bárust fréttir af níu systkina hópi á Sardiníu sem talinn er sá elsti í heimi, en samanlagt hafa systkinin lifað í 818 ár. Systkinin hafa formlega verið skráð á heimsmetalista Guinness. Ljóst er að höfundar listans hafa ekki kembt íslenskar sveitir af mikilli natni því hér á landi má finna hóp ellefu systkina sem samtals eru 882 ára og skjóta þau því systkinunum á Sardiníu rækilega ref fyrir rass.“
Fréttina má lesa í heild á mynd nr. 2 ef hún er stækkuð með því að smella á hana.