Fræðslumiðstöð Vestfjarða gengst fyrir tálgunarnámskeiði á Hólmavík núna á föstudagskvöld og laugardag. Fjallað verður um ýmsar íslenskar viðartegundir, eiginleika þeirra og nýtingu. Kennd verður meðferð, umhirða og beiting verkfæra. Þátttakendur læra að tálga nytjahluti og skrautmuni úr efni sem almennt er kallað „garðaúrgangur“ og fullgera tálguhluti, þurrka, pússa og bera á.

Námskeiðið er öllum opið sem vilja læra hvernig hægt er að nota ferskan við úr skóginum, garðinum eða sumarbústaðalandinu. Hraði og yfirferð miðast við getu og áhugasvið hvers þátttakanda. Námskeiðið hentar einnig unglingum sem áhuga hafa á tálgun. Í tilkynningu frá Fræðslumiðstöðinni er minnt á, að flest stéttarfélög veiti styrki til þess að sækja námskeið.

Kennari á námskeiðinu er Ólafur Oddsson. Námskeiðið verður í smíðastofu Grunnskólans á Hólmavík (í „nýja skóla“) kl. 18-21 á föstudagskvöld og kl. 9-16 á laugardag. Verðið er kr. 16.500 og efnisgjald innifalið.

► Fræðslumiðstöð Vestfjarða - Tálgað í tré, skráning