Kristján Kristjánsson, forstöðumaður hjá Vegagerðinni, segir ekki hægt að segja til um hvort stofnunin treysti sér til að bæta B-leiðinni inn í matsáætlun vegna umhverfismats við leiðarval fyrir nýjan Vestfjarðaveg um Gufudalssveit. Þetta kemur fram í Morgunblaðinu í dag. Eins og hér kom fram hefur sveitarstjórn Reykhólahrepps lýst undrun sinni á því að leið B skuli ekki tekin með í drög að matsáætlun og jafnframt krafist þess að leið A1 verði tekin þar með.

„Á samráðsfundum með innanríkisráðherra haustið 2011 voru skilaboðin þau, að skoða ætti alla kosti á láglendi og sér sveitarstjórn ekki að það sé uppfyllt nema að tekið verði tillit til ofangreindra athugasemda,“ sagði í bókun hreppsnefndar 23. júlí.

Kristján segir í samtali við Morgunblaðið í dag að allmargar umsagnir um drög að matsáætlun hafi borist og von sé á fleiri í þessari viku. Kristján telur að veigamestu athugasemdirnar snúi að því að ekki var gert ráð fyrir B-leiðinni svonefndu í drögunum.

B-leiðin myndi þvera Gufufjörð og Djúpafjörð og liggja um hinn umdeildaTeigsskóg við Þorskafjörð vestanverðan. Í staðfestu aðalskipulagi Reykhólahrepps er gert ráð fyrir leið B, en sveitarfélög fara með skipulagsvaldið lögum samkvæmt.

„Vegagerðin telur hins vegar fullreynt, vegna dóms Hæstaréttar, að fá leyfi til að leggja veginn eftir þessari leið. Þess vegna ákvað stofnunin að skoða þrjár aðrar leiðir,“ segir í frétt Morgunblaðsins í dag. Fyrsti kostur Vegagerðarinnar er að gerð verði jarðgöng undir Hjallaháls.

Sjá einnig:

23.07.2012 Alvarlegar athugasemdir við drög að matsáætlun

04.07.2012 Drög að tillögu að matsáætlun auglýst