Það er gott að búa á Reykhólum ...
Öfugt við það sem gerist víða um land er jafnan skortur á húsnæði á Reykhólum. Þó er alltaf verið að byggja og ekki aðeins íbúðarhús. Núna er einmitt bílskúr í smíðum við Hellisbrautina þar sem Eiríkur Kristjánsson húsasmiður og Kolfinna Ýr Ingólfsdóttir kennari búa ásamt börnum sínum. Hæg eru heimatökin hjá sjálfum húsasmiðnum þó að hann verði helst að grípa í verkið um helgar og á kvöldin vegna annríkis við önnur verkefni.
Um síðustu helgi var getið hér um „mildan málningareim" sem lagði um Reykhólaþorp. Þá var Eiríkur að mála þakið á íbúðarhúsinu fagurrautt eins og sést á mynd nr. 2.
Ef ónefndur bæjarstjóri í Kópavogi ætti heima í þessu litla og hlýlega þorpi við Breiðafjörðinn, þá er ekki ósennilegt að hann segði með djúpri raust: Það er gott að búa á Reykhólum.