Atvinnuþróunarfélag Vestfjarða minnir á að nú er að hefjast sá tími að hinir ýmsu sjóðir auglýsi styrkfé sitt til úthlutunar, auk þess sem Impra á Nýsköpunarmiðstöð er að fara af stað með verkefni. Á þessum tímapunkti er mikilvægt, segir í tilkynningu frá Atvest, að þeir sem hafa hug á því að sækja um styrkfé skilgreini vel hvað á að sækja um og hafi skýr markmið með þeirri vinnu sem fyrirhuguð er. Atvest hefur í gegnum árin veitt aðstoð við yfirlestur, útfærslu og aðra ráðgjöf við styrkumsóknir og í sumum tilfellum hefur félagið unnið umsóknina í heild sinni í samstarfi við frumkvöðla eða fyrirtæki.

 

Atvest vill hvetja alla sem hafi áhuga og hugmyndir til að leita til félagsins varðandi ráðgjöf, útfærslur og hugsanlega aðstoð vegna styrkumsókna. Æskilegast er að þeir aðilar sem þurfa aðstoð ræði um sín verkefni við Atvest eigi síðan en virkum dögum fyrir skilafrest.

 

Þeir styrkir og þau verkefni sem hafa verið auglýst og hafa umsóknarfrest í janúar eru til að mynda:

 

________________________________

 

Impra - Krásir, þróunarverkefni á sviði svæðisbundinnar matargerðar

 

Tilgangur verkefnisins er að styrkja þróun í svæðisbundinni matargerð og efla ferðaþjónustu með því að framleiða og selja matvörur sem byggja á hráefni, sögu og þekkingu á ákveðnum svæðum. Þeir, sem taka þátt í verkefninu taka þátt í fræðslu um þróun, vinnslu og meðferð matvæla og fá auk þess fjárhagslegan og faglegan stuðning við þróun á nýjum afurðum. Með verkefninu er verið að auka þekkingu á gæðum og faglegri vinnu við þróun á nýjum matvörum.

 

Umsóknarfrestur er til 12. janúar 2009.

 

________________________________

 

Impra - Vöruþróun á Vestfjörðum

 

er stuðningsverkefni sem ætlað er starfandi fyrirtækjum á Vestfjörðum sem vilja vinna að nýsköpun, vexti eða umbótum í starfsemi sinni. Fyrirtæki á Vestfjörðum sem búa yfir hugmynd að vöru eða þjónustu sem þau telja að feli í sér verulegt nýnæmi og ábata fyrir rekstur þeirra geta sótt um í verkefnið.

 

Stuðningurinn felst í tveimur meginþáttum:

 

- Faglegri aðstoð sem beinist að því að leiða verkefnið þrep fyrir þrep með verkefnisstjórnun í gegnum þróunartímabilið.

 

- Fjárhagslegri aðstoð í formi styrks að hámarki 3.000.000 kr. til hvers fyrirtækis, gegn a.m.k. jafnháu mótframlagi fyrirtækisins.

 

Umsóknarfrestur er til 12. janúar 2009.

 

________________________________

 

Ferðamálastofa - Styrkir til úrbóta á ferðamannastöðum

 

Styrkir skiptast í þrjá meginflokka og sérstök áhersla verður lögð á verkefni sem stuðla að bættu aðgengi að áningarstöðum. Flokkarnir eru:

 

- Til minni verkefna:

Úthlutað verður til minni verkefna í umhverfismálum. Aðallega verða veittir styrkir til efniskaupa. Hámarksupphæð hvers styrks verður 500 þúsund krónur

 

- Til stærri verkefna á fjölsóttum ferðamannastöðum:

Veittir verða styrkir til stærri verkefna þar sem umsækjendur stýra framkvæmdum og svæðin verða í umsjón eða eigu styrkþega eftir að framkvæmdum lýkur.

 

- Til uppbyggingar á nýjum svæðum:

Veittir verða styrkir til uppbyggingar á nýjum svæðum sem skipulögð hafa verið þannig að ferðamönnum nýtist viðkomandi svæði.

 

Umsóknarfrestur er til 31. janúar 2009.

 

________________________________

 

AVS-sjóðurinn

 

Á árinu 2009 leggur AVS-sjóðurinn áherslu á styttri verkefni og munu umsóknir þar sem verkefni eru til skemmri tíma en 12-18 mánaða að öllu jöfnu njóta forgangs. Lögð verður mikil áhersla á verkefni sem skila fljótt verðmætum og nýjum störfum fyrir íslenskan sjávarútveg. Sjóðurinn er opinn fyrir öllum hugmyndum sem auka verðmæti sjávarfangs, s.s. orkusparandi veiðiaðferðum, vistvænni veiðitækni, fullvinnslu, vörum í smásölu eða á borð neytenda, nýjum afurðum, nýrri tækni, aukinni nýtingu, matarferðamennsku, hönnun, fiskeldi, nýjum tegundum eða öðru því sem getur skilað styrkþegum verðmætri afurð á stuttum tíma.

 

Umsóknarfrestur er til 30. janúar 2009.

 

________________________________

 

Impra - Framtak

 

Verkefni sem veitir starfandi fyrirtækjum á landsbyggðinni aðstoð við að þróa þjónustu eða vöru á innanlandsmarkað eða til útflutnings. Styrkir eru veittir til þróunar hjá starfandi fyrirtækjum á landsbyggðinni og fá þátttakendur faglegan og fjárhagslegan stuðning við þróunina og er markmiðið að koma samkeppnishæfri þjónustu eða vöru á markað innan 18 mánaða frá upphafi verkefnisins. Verkefnið er hugsað fyrir fyrirtæki sem hafa starfað í a.m.k. 2 ár og velta a.m.k. 10 milljónum árlega.

 

Verkefnið er alltaf opið til umsóknar. Umsóknir þurfa að berast fyrir 15. hvers mánaðar til að fá afgreiðslu í þeim mánuði.

 

________________________________

 

Impra - Frumkvöðlastuðningur

 

Markmiðið er að styðja við nýsköpunarhugmyndir einstaklinga og smærri fyrirtækja með því að veita styrki til verkefna sem stuðla að framþróun viðskiptahugmynda. Með framþróun er átt við verkefni sem snúa að gerð viðskiptaáætlana, nýnæmisathugana, einkaleyfisumsókna, markaðsathugana, rekstrar- og fjárhagsáætlana, hönnunarverndar, hagkvæmnisathugana, þróunar vöru eða þjónustu, prófana og frumgerðarsmíða.

 

Styrkir eru eingöngu veittir til nýsköpunarverkefna á landsbyggðinni. Getur stuðningur við frumkvöðul numið allt að 600 þús. kr. gegn jafnháu framlagi styrkþega. Ekki eru veittir styrkir til fjárfestinga í húsnæði eða til kaupa á tækjum og búnaði.

 

Verkefnið er alltaf opið til umsóknar. Umsóknir þurfa að berast fyrir 15. hvers mánaðar til að fá afgreiðslu í þeim mánuði.

 

________________________________

 

Vefur Atvinnuþróunarfélags Vestfjarða