Þetta vindur upp á sig
„Sumarið hefur verið mjög gott,“ segir Steinar Pálmason, sem rekur gistiheimilið Álftaland á Reykhólum. „Í júlímánuði vorum við með fullt inni nánast alla daga og á Reykhóladögunum um síðustu helgi voru hátt í tvö hundruð manns hjá okkur í gistingu, bæði í húsinu og á tjaldsvæðinu.“ Steinar segir að velgengni Reykhóladaga síðustu árin hafi leitt til þess að stöðugt fleira fólk komi á svæðið og nýti sér gistingu og þjónustu hjá honum og öðrum. „Þetta vindur upp á sig og sumir koma aftur og aftur og taka einhverja nýja með sér.“
Steinar veit um fólk sem kom núna á Reykhóladaga þriðja árið í röð.
Sjö ár eru síðan Steinar Pálmason keypti Álftaland. „Það hefur verið stígandi í aðsókninni jafnt og þétt allan tímann þó að það hafi ekki verið í neinum stökkum,“ segir hann.
„Aðalsmerkið hjá okkur er að bjóða bæði uppbúin rúm og svefnpokapláss í sömu herbergjum. Hérna getur fólk eldað sjálft. Það hefur mikið að segja bæði fyrir gestina og fyrir starfsmannahaldið hjá okkur.“
Síðan í fyrra er Steinar búinn að tvöfalda tjaldsvæðið við Álftaland (tjöld, húsbílar og allt það) eða um fjögur þúsund fermetra. „Það hefur ekki veitt af þeirri viðbót á toppunum í sumar.“
► 31.05.2011 Gistiheimilið Álftaland: Gott verður betra
► 31.07.2012 Glæsiþyrla í útsýnisflugi á Reykhólum
► Álftaland - gistihús í sveit