Kort úr greinargerðinni með tillögunni.

Forsvarsmenn sveitarfélaga á sunnanverðum Vestfjörðum undrast mjög þau vinnubrögð, að á Alþingi skuli lögð fram tillaga þess efnis að umtalsverður hluti Reykhólahrepps skuli gerður að þjóðgarði, án nokkurs samráðs við þá sem hlut eiga að máli. Þingmennirnir Róbert Marshall og Mörður Árnason lögðu tillöguna fram seint á síðasta vetri. Á fundi umhverfis- og náttúruverndarnefndar Reykhólahrepps í gær var tekin fyrir umsagnarbeiðni frá umhverfis- og samgöngunefnd Alþingis, dagsett 17. nóvember, og eftirfarandi bókað:

„Nefndin lýsir furðu sinni á því að aðilar komi fram með frumvarp til verndunar svæða án samráðs við sveitarstjórn og íbúa. Ákvörðun um verndun svæða á að vera ákvörðun sveitarstjórnar, íbúa sveitarfélagsins og þeirra fagaðila sem þau hafa leitað til.“ Bent er á að skipulagsvaldið sé hjá sveitarfélögunum og samkvæmt nýsamþykktu aðalskipulagi Reykhólahrepps sem gildir til 2018 sé ekki gert ráð fyrir þjóðgarði á umræddu svæði.

Á síðasta fundi sínum mótmælti hreppsnefnd Tálknafjarðarhrepps „yfirgangi einstakra þingmanna gagnvart sjálfræðisrétti og skipulagsvaldi sveitarfélaga“. Bókað var að „slík framkoma“ gangi „þvert á vilja stjórnvalda á sveitarstjórnarstigi, sem og hjá framkvæmdavaldi, að stunda samráð á öllum stigum“.

Jafnframt tók hreppsnefnd Tálknafjarðarhrepps undir eftirfarandi bókun bæjarráðs Vesturbyggðar sem gerð var skömmu eftir að tillagan kom fram:

„Bæjarráð Vesturbyggðar lýsir undrun sinni á framkominni þingsályktunartillögu frá Róbert Marshall og Merði Árnasyni um stofnun þjóðgarðs við norðanverðan Breiðafjörð á svæðinu milli Þorskafjarðar og Vatnsfjarðar og því að ekki sé haft samráð við íbúa svæðisins og hagsmunaaðila um svo afdrifaríka tillögu sem hafa mun áhrif á svæðið allt.“

Þingsályktunartillaga Róberts og Marðar er svohljóðandi:

„Alþingi felur umhverfisráðherra að undirbúa stofnun þjóðgarðs við norðanverðan Breiðafjörð, á svæðinu milli Þorskafjarðar og Vatnsfjarðar. Ráðherra lýsi undirbúningi sínum fyrir Alþingi í formi lagafrumvarps eða skýrslu fyrir árslok 2011.“

Tillögunni fylgir ítarleg greinargerð. Þar kemur fram að að landsvæði þjóðgarðsins skuli ná frá vestanverðum Þorskafirði um Djúpafjörð, Gufufjörð, Kollafjörð, Kvígindisfjörð, Skálmarfjörð, Vattarfjörð, Kerlingarfjörð, Mjóafjörð, Kjálkafjörð og Vatnsfjörð, og svo langt upp í dali og hálendi að norðan sem hæfa þyki.

„Það er verið að leggja til þjóðgarð án nokkurs samráðs við sveitarfélögin og landeigendur sem eiga þarna land. Við erum að vinna að því að byggja upp þjóðgarð á Látrabjargi og að því koma allir hagsmunaaaðilar, en sú ákvörðun er ekki sett með lögum frá Alþingi,“ segir Eyrún Ingibjörg Sigþórsdóttir, oddviti Tálknafjarðarhrepps, í samtali við bb.is á Ísafirði í dag.

„Ef tillagan verður samþykkt gæti það sett vegagerð á svæðinu í uppnám. Vegir um þjóðgarða eru ekki byggðir upp með hámarksöryggi í huga og hraða sem þjóðvegir hafa almennt. Það verður aldrei of oft undirstrikað að þetta er eini vegurinn til okkar og frá,“ segir Eyrún Ingibjörg.

Tillaga Róberts og Marðar ásamt greinargerð

Sjá einnig:

28.03.2011  Verulegur hluti Reykhólahrepps þjóðgarður?

06.04.2011  Þjóðgarðstillagan: Boða þingmenn akandi vestur