Þjóðhátíðardagurinn í Reykhólasveit
Á þjóðhátíðardaginn var í Bjarkalundi haldin fyrsta almenna samkoman frá því í byrjun mars, að saltkjötsveisla Lions var haldin.
Í Bjarkalundi voru að venju hátíðahöld, að þessu sinni í samstarfi við Ungmennafélagið Aftureldingu, en hin ýmsu félög á svæðinu hafa skipst á um að halda þessa skemmtun.
Á þjóðhátíðardaginn kemur fjallkonan fram og flytur hugvekju og gjarnan kvæði, að þesu sinni var Ása Fossdal í hlutverki fjallkonunnar og flutti kvæðið Tungumálið mitt, eftir Júlíönu Jónsdóttur, sem var fædd á Búrfelli í Hálsasveit í Borgarfirði 1838 og var fyrst íslenskra kvenna til að gefa út ljóðabók. Það var bókin Stúlka sem kom út árið 1876. Júlíana lést í Bandaríkjunum 12. júní árið 1917.
Boðið var upp á hoppukastala og andlitsskreytingu fyrir yngri kynslóðina og kafffihlaðborð var í Bjarkalundi.
Einnig var opið í ÖSSU í Króksfjarðarnesi og vöfflur og fleira góðgæti í boði, ásamt ótrúlega fjölbreyttu handverki.