Sveitarstjórn Reykhólahrepps samþykkti á á fundi sínum 9. maí sl. að auglýsa til kynningar og umsagnar vinnslutillögu um verndarsvæði í byggð í Flatey.  Vinnslutillagan er hjálögð.

Um Breiðafjörð og eyjar hans gilda sérstök lög (nr. 54/1995) sem hafa þann tilgang að stuðla að verndun landslags, jarðmyndana, lífríkis og menningarminja. Nýleg lög um verndarsvæði í byggð (nr. 87/2015) gera kleift að festa vernd Þorpsins í Flatey enn betur í sessi og fékk Reykhólahreppur styrk úr Húsafriðunarsjóði til að vinna tillögu til  mennta- og menningamálaráðherra um að þorpið í Flatey verði gert að verndarsvæði í byggð á grundvelli síðarnefndu laganna. Stýrihópur sem samanstendur af tveimur fulltrúum úr sveitarstjórn og tveimur fulltrúum frá Framfarafélagi Flateyjar hefur haft umsjón með tillögugerðinni. Nánari upplýsingar um verkefnið má finna á vefnum www.flateyverndartillaga.com og þar má einnig nálgast tillöguna sjálfa.

Öllum sem telja sig eiga hagsmuna að gæta er gefinn kostur á að gera athugasemdir við tillöguna til 15. ágúst 2018.  Athugasemdir eða ábendingar skulu berast með tölvupósti á netfangið sveitarstjori@reykholar.is í síðasta lagi 15. ágúst 2018.

Ný sveitarstjórn mun fjalla um tillöguna og framkomnar athugasemdir við hana í ágúst/september og taka ákvörðun um framhaldið.  Ef ákveðið verður að auglýsa tillöguna formlega skv. 5. gr. laga um verndarsvæði í byggð, gefst aftur 6 vikna athugasemdafrestur áður en gengið er frá tillögu til ásamt greinargerð til ráðherra.