Þorrablótið: Forsala og miðar sóttir í dag
Þorrablótsnefndin í Reykhólahreppi minnir á forsölu aðgöngumiða sem verður í íþróttahúsinu á Reykhólum í dag, föstudag, milli kl. 14 og 18. Allir sem eru búnir að panta eru hvattir til þess að koma og sækja pantanir sínar á þessum tíma til þess að minnka örtröð við innganginn annað kvöld þegar blótið brestur á.
Í dag er bóndadagur, fyrsti dagur þorra, en hann er fjórði mánuður vetrar samkvæmt gamla norræna tímatalinu. Þorrinn byrjar ævinlega á föstudeginum í þrettándu viku vetrar. Á bóndadegi hafa ríkt ýmsar hefðir, misvel ræktar þó. Að þessu sinni er líklega heldur hvasst og kaldsamt í Reykhólahreppi til þess að margir bændur (húsbændur, eiginmenn) hoppi kringum húsið á nærbuxunum einum klæða. Samt er aldrei að vita nema þeirra bíði þá blómvöndur eða koss eða sviðasultusneið frá konunni þegar inn er komið. Það fer svo eftir smekk hvers og eins hvað af þessu þrennu honum þykir best að fá.
Ítarefni:
> Auglýsingin um þorrablótið 2009
> Þarabandið á lítið skylt við breiðfirskan þara
> Allt sem ég hef misst (þorrablót 2008)