Annað kvöld brestur á þorrablótið árvissa og vinsæla á Reykhólum. Að þessu sinni er sú nýlunda þar, að foreldrar og aðrir aðstandendur nemenda í 8.-10. bekk í Reykhólaskóla ætla að vera með sjoppu eftir að borðhaldi lýkur. Einnig verða til sölu heitar og kaldar samlokur. Þetta er gert í fjáröflunarskyni vegna Danmerkurferðar nemenda sem áformuð er í vor. Aldrei er að vita nema einhverjir finni til löngunar í eitthvað annað og meira þegar líður frá aðalmáltíðinni á blótinu. Sumir koma líka ekki fyrr en að loknu borðhaldi.

 

Að þessu sinni semur Guðjón Dalkvist Gunnarsson (Dalli) á Reykhólum annál ársins og flytur hann á þorrablótinu. Síðustu árin hafa Sveinn Ragnarsson á Svarfhóli eða Dalli samið annálinn og má ekki á milli sjá hvor þeirra er ríkari að skopskyni og stílfærni.

 

Þorrablótið er eins og áður í íþróttahúsinu á Reykhólum. Húsið verður opnað kl. 19.30 en borðhald hefst kl. 20.30. Aldurstakmark er 16 ár.

 

Nánari upplýsingar um blótið má nálgast hér.