Þorrablótið í Reykhólahreppi 2010 verður í íþróttahúsinu á Reykhólum í kvöld, fyrsta laugardaginn í þorra. Á borðum verður fjölbreyttur úrvals þorramatur að hætti Árna í Bjarkalundi en hljómsveitin Vítamín sér um dansfjörið. Undir borðum verða að venju ýmis gamanmál höfð í frammi. Húsið verður opnað kl. 20.00 en borðhaldið hefst kl. 20.30. Aldurstakmark er 16 ár. Miðaverð er kr. 5.500. Ef eingöngu er farið á dansleikinn er miðaverðið kr. 2.500.

 

Í gær var bóndadagur, fyrsti dagur þorra, en hann er fjórði mánuður vetrar samkvæmt gamla norræna tímatalinu. Þorrinn byrjar ævinlega á föstudeginum í þrettándu viku vetrar, eða á bilinu 18.-24. janúar miðað við það tímatal sem nú er notað. Síðasti dagur þorra nefnist þorraþræll. Daginn eftir byrjar góa og fyrsti dagur hennar er konudagurinn.