« 1 af 2 »

Vegamálastjóri segir nærtækast að brúa Þorskafjörð utarlega, verði lagning vegar um Teigsskóg við vestanverðan Þorskafjörð ekki leyfð. Sú lausn kæmi þorpinu á Reykhólum til góða. Þetta kom fram í fréttum Stöðvar 2 í gærkvöldi. Samgönguráðherra hefur lagst gegn vegi um Teigsskóg (leið B) og lagt til að gerð yrðu göng undir Hjallaháls. Sú framkvæmd liti hins vegar ekki dagsins ljós fyrr en í fjarlægri framtíð.

Ráðherra hefur falið Vegagerðinni að skoða kostina í stöðunni og segir vegamálastjóri allt að fimm leiðir til skoðunar. Ef leiðin um Teigsskóg sé úti, sem ekki séu þó allir sammála um, segir hann ljóst að jarðgöng séu dýr og unnt sé að leggja ódýrari láglendisveg. Þá sé nærtækast, segir vegamálastjóri, að fara út með Þorskafirði að austanverðu og þar yfir en síðan yrði fylgt sömu leið og áður var áformað samkvæmt leið B.

Samkvæmt þessu yrðu Þorskafjörður, Djúpifjörður og Gufufjörður allir þveraðir. Brú yfir utanverðan Þorskafjörð þýddi að einfalt yrði að gera þar vegtengingu við Reykhóla, sem kæmust þannig í alfaraleið. Leggja þyrfti nýjan veg milli Árbæjar á Reykjanesi og væntanlegrar brúar yfir Þorskafjörð. Jafnframt má þá reikna með því að vegurinn frá Reykhólum út að Stað og Árbæ fengi bundið slitlag.

Vegamálastjóri segir undirbúning miða við að unnt verði að bjóða verkið út eftir þrjú ár, eða um það leyti sem endurbyggingu vegarins milli Kjálkafjarðar og Vattarfjarðar lýkur.

► Smellið hér á frétt Stöðvar 2, þar sem m.a. er rætt við Hrein Haraldsson vegamálastjóra

Sjá einnig:

► Sveitarstjórn vill format umhverfisáhrifa leiðar A (26. október 2011)