Þörungaverksmiðja í Stykkishólmi í undirbúningi
„Ég met nokkuð góðar líkur á að af þessu verði, miðað við þær upplýsingar sem við höfum frá þessum aðilum“„ segir Sturla Böðvarsson, bæjarstjóri í Stykkishólmi, um áform fyrirtækisins Deltagen Iceland og Matís um að koma upp þörungaverksmiðju í Stykkishólmi.
Deltagen Iceland er dótturfyrirtæki írska fyrirtækisins Marigot sem meðal annars rekur Kalkþörungaverksmiðjuna á Bíldudal. Matís er samstarfsaðili þess við verkefnið. Hugmyndin er að safna þangi og þörungum í Breiðafirði og gera úr þeim þykkni sem flutt verður út í tönkum eða brúsum. Það er notað sem áburður á akra og einnig unnið úr þeim fæðubótarefni og efni í húðkrem og hugsanlega lyf í framtíðinni.
Frá þessu er greint í Morgunblaðinu í dag. Þar segir einnig m.a.:
Sturla segir fyrirtækið þurfa leyfi atvinnuvegaráðuneytisins til að nýta auðlindina í Breiðafirði. Í ráðuneytinu er verið að undirbúa breytingar á lögum um stjórn fiskveiða til að láta þessa auðlindanýtingu falla þar undir. Vonar Sturla að hægt verði að ljúka þeirri vinnu fyrir vorið.
Jafnframt er Hafrannsóknastofnun að undirbúa rannsókn á magni þangs og þörunga í Breiðafirði. Það er gert á grundvelli samkomulags sem Stykkishólmsbær beitti sér fyrir. Að því standa Hafró, Marigot og Matís, Þörungaverksmiðjan á Reykhólum og Félagsbúið Miðhrauni, sem einnig hefur áhuga á að nýta þangið til vinnslu.
Sturla vekur athygli á því að ætlunin er að nýta þang og þörunga á svæðum sem eru innan netalaga og því á forræði landeigenda. Því þurfi þeir sem ætla að skera þangið að hafa samninga við landeigendur auk veiðileyfis lá grundvelli laga um stjórn fiskveiða.
22.11.2015 Samkomulag um rannsóknir á lífríki Breiðafjarðar
22.10.2015 Er ekki kominn tími til að ræða þetta eitthvað?
03.10.2015 Óttast ofnýtingu þörunga í Breiðafirði