Reiknað er með að Fossá, nýtt skip Þörungaverksmiðjunnar á Reykhólum, geti tvöfaldað öflunargetu verksmiðjunnar. Slippurinn á Akureyri er að ljúka breytingum á skipinu og verður það afhent eftir reynslusiglingar í lok mánaðarins. Unnið er að ýmsum breytingum í verksmiðjunni til að auka afköst, en fyrirtækið annar ekki vaxandi eftirspurn. Atli Georg Árnason, framkvæmdastjóri, vonast til að framleiðsla fyrirtækisins tvöfaldist á næstu árum.

 

Þannig hefst umfjöllun í Morgunblaðinu í dag um málefni Þörungaverksmiðjunnar á Reykhólum. Undirfyrirsagnir eru „Fossáin verður afhent Þörungaverksmiðjunni í lok mars“ og „Framleiðslan á Reykhólum gæti tvöfaldast á næstu árum“. Höfundur þessarar umfjöllunar er Ágúst Ingi Jónsson (aij@mbl.is). Hún er birt hér í heild með leyfi Morgunblaðsins.

 

Bandaríska fyrirtækið FMC Corporation á 71,6% í Þörungaverksmiðjunni, en Byggðastofnun á 27,7% hlut. Aflað hefur verið klóþangs og hrossaþara í Breiðafirði og til skoðunar er að bæta einni tegund við. Alls voru framleidd um sex þúsund tonn af mjöli á Reykhólum á síðasta ári og framleiðsla hefur aukist hægt og bítandi síðustu ár. Hagnaður varð af rekstri fyrirtækisins í fyrra.

 

„Markaðurinn fyrir afurðir verksmiðjunnar er mjög fjölbreyttur, en mjölið er að mestu flutt út. Það er notað sem íblöndunarefni í lyf, en einnig í ýmsa iðnaðarframleiðslu og fóðurbæti fyrir dýr og fólk,“ segir Atli Georg. „Eins og staðan er núna fullnægjum við ekki þörfum markaðarins þar sem eftirspurnin hefur vaxið hraðar en afkastagetan. Nú erum við í fjárfestingum í verksmiðjunni og erum meðal annars að tölvu- og nútímavæða framleiðsluferla. Með því eykst afkastagetan og ég á von á fjölgun starfsmanna með auknum umsvifum, en nú eru 22 ársverk í verksmiðjunni.“

 

Skiptir sköpum fyrir samfélagið á Reykhólum

 

Atli segir að starfsemi Þörungaverksmiðjunnar skipti sköpum fyrir samfélagið á Reykhólum og miklu máli fyrir íslenskt þjóðarbú. Hann segir að frá því að nýir eigendur, FMC Corporation, komu að fyrirtækinu fyrir þremur árum, nemi velta fyrirtækisins og fjárfestingar til framtíðar yfir 1.350 milljónum króna. Fossá verður afhent síðar í þessum mánuði, en stýrishús var fært fram á skipið, en áður var það afturbyggt. Skipt var um skrúfubúnað skipsins og ýmsar breytingar voru gerðar á því samfara breytingum úr kúfiskveiðiskipi í þangflutningaskip, en þang og þari verða flutt í opinni lest.

 

Byrjað var á breytingunum hjá Skipasmíðastöð Þorgeirs og Ellerts á Akranesi í desember 2009. Eftir að deilur komu upp milli aðila og að undangengnum dómsúrskurði var skipið dregið til Akureyrar í desember 2010 og hefur síðan verið unnið að breytingunum hjá Slippnum á Akureyri.

 

Nýr skjólgarður hefur sannað gildi sitt

 

Í fyrra byggði Suðurverk skjólgarð austan hafnargarðsins á Reykhólum. Hann hefur þegar sannað gildi sitt, að sögn Atla Georgs, en þetta eru fyrstu hafnarframkvæmdir í Reykhólahöfn frá því hún var byggð á miðjum áttunda áratugnum, segir á heimasíðu Siglingastofnunar, sem bauð verkið út. Um leið stóð sveitarfélagið fyrir gerð uppfyllingar innan nýja skjólgarðsins og samanlagt munu framkvæmdirnar bæta aðstöðu Þörungaverksmiðjunnar og skapa aukna möguleika fyrir útgerð smærri báta.

 

Viðurkenningar

 

Þörungaverksmiðjan fékk nýlega viðurkenningu Creditinfo fyrir að vera eitt af 177 framúrskarandi fyrirtækjum í íslensku fjármálalífi. Í fyrra fékk fyrirtækið forvarnaverðlaun VÍS.

 

Á myndinni eru í Slippnum á Akureyri þeir Atli Georg Árnason, framkvæmdastjóri Þörungaverksmiðjunnar á Reykhólum, og Bjarni Ásmundsson skipatæknifræðingur, ráðgjafi Þörungaverksmiðjunnar við breytingar á Fossánni. Mynd mbl/Kristján Kristjánsson.

 

Sjá einnig:

27.02.2011  Þörungaverksmiðjan er „framúrskarandi fyrirtæki“

Vefur Þörungaverksmiðjunnar á Reykhólum