Æfingar til að auka vöðvastyrk og þol, ætlaðar báðum kynjum jafnt, hefjast í íþróttahúsinu á Reykhólum í kvöld, þriðjudag, og verða svo framvegis fjóra daga í viku undir stjórn Sirrýjar Birgis. „Þetta er hreyfing sem hentar öllum. Fólk ræður ferðinni sjálft og ræður hvort það vill taka vel á eða fara rólega í sakirnar. Við verðum fjórum sinnum í viku fyrir þá sem vilja en svo er það bara undir hverjum og einum komið hversu oft er mætt“, segir Sirrý.

Hún hvetur alla til að stunda einhvers konar hreyfingu. „Eftir því sem við eldumst verður það nauðsynlegra. Svo vil ég sérstaklega koma því á framfæri að karlpeningurinn þarf ekki að hræðast okkur konurnar. Þetta er ekki „kerlingaleikfimi“ og við tökum vel á móti körlunum ef þeir þora.“

Æfingatímarnir verða á þessum dögum og tímum fram í miðjan maí:

• Mánudaga og miðvikudaga kl. 16.30
• Þriðjudaga og fimmtudaga kl. 18.00