Lagt af stað með minnisvarðana.

Hátíðarstund verður við Tjarnarlund í Saurbæ í Dalasýslu kl. 14 á morgun, laugardag, þegar afhjúpaðir verða minnisvarðar ásamt söguskilti í minningu þriggja andans manna, þeirra Sturlu Þórðarsonar söguritara, Stefáns skálds frá Hvítadal og Steins Steinars skálds. Jón Sigurpálsson myndlistarmaður á Ísafirði gerði minnisvarðann, en honum er valinn staður þar sem sér heim að bæjum í Saurbænum þar sem Sturla, Stefán og Steinn áttu heima um lengri eða skemmri tíma Sögufélag Dalamanna stendur fyrir verkefninu að frumkvæði Sigurðar Þórólfssonar í Innri-Fagradal.

Sturla Þórðarson (1214-1284) var bróðursonur Snorra Sturlusonar. Hann var um tíma konunglegur sagnaritari við hirð Noregskonungs en kom síðan aftur heim til Íslands með nýja lögbók fyrir Íslendinga í farteskinu. Eftir það var hann um skeið lögmaður og þar með æðsti embættismaður hérlendis. Eftir hann liggur Íslendinga saga, eitt meginritanna í Sturlungu, sem er safn samtíðarfrásagna um atburði hérlendis á Sturlungaöld. Nokkur fleiri sagnarit eru eignuð honum með misjafnlega mikilli vissu. Sturla bjó löngum á Staðarhóli í Saurbæ en síðustu árin í Fagurey á Breiðafirði. Hann er jarðsettur á Staðarhóli.

Stefán Sigurðsson frá Hvítadal (1887-1933) fæddist á Hólmavík en ólst upp á Stóra-Fjarðarhorni í Kollafirði. Um fermingu fluttist hann ásamt fósturforeldrum sínum að Hvítadal í Saurbæ og átti þar heima næstu árin og kenndi sig jafnan við þann bæ. Fyrsta ljóðabók hans, Söngvar förumannsins, kom út árið 1918 og var tímamótaverk í íslenskri ljóðagerð. Síðasta áratug ævinnar átti Stefán heima að Bessatungu í Saurbæ.

Steinn Steinarr / Aðalsteinn Kristmundsson (1908-1958) fæddist á Laugalandi við Ísafjarðardjúp en fluttist í frumbernsku ásamt móður sinni suður í Saurbæ og ólst þar upp, að mestu í Miklagarði. Síðar var hann aðallega búsettur í Reykjavík og gerðist eitt af höfuðskáldum þjóðarinnar. Fyrsta ljóðabók hans kom út árið 1934 en kunnastur mun Steinn vera fyrir ljóðaflokkinn Tímann og vatnið.

Athöfnin hefst kl. 14 eins og áður segir með afhjúpun minnisvarðanna. Síðan verður farið inn í Tjarnarlund þar sem fram fer dagskrá í minningu mannanna þriggja jafnframt því sem kaffi og meðlæti verður á borðum.

Verkefni þetta er metnaðarfullt og kostnaðarsamt og þess vegna er leitað eftir stuðningi og velvilja fyrirtækja og einstaklinga og öll framlög vel þegin. Ef vilji er til að styrkja þetta verkefni, þá er reikningur Sögufélags Dalamanna 312-13-905400 og kennitalan 111132-2759.

Á myndinni er Sigurlaugur Baldursson flutningabílstjóri á Ísafirði að leggja af stað í gærmorgun með minnisvarðana áleiðis í Saurbæinn. Ljósm. bb.is / Þorsteinn J. Tómasson.