Þrír áratugir síðan Sigurvin á Gilsfjarðarbrekku fórst
Í gær voru þrjátíu ár liðin frá slysinu hörmulega þegar Sigurvin Helgi Baldvinsson á Gilsfjarðarbrekku fórst í bílslysi í Gilsfirði. Hann var rétt liðlega þrítugur. Með honum í bílnum voru Hugrún Einarsdóttir eiginkona hans, 23 ára, og dætur þeirra tvær, Sigríður Magnea, fimm ára, og Ólafía, þriggja ára. Þær mæðgurnar köstuðust út úr bílnum á leiðinni niður snarbratta brekkuna en Sigurvin fór með honum alla leið niður í fjöru og mun hafa látist samstundis. Þessi atburður er enn í fersku minni fólksins í héraðinu þó að liðnir séu þrír áratugir.
Bæði Hugrún og Ólafía dóttir þeirra, sem búsett er á Reykhólum, minntust slyssins á Facebooksíðum sínum í gær. Þar birti Hugrún myndina af þeim hjónum ásamt dætrunum þeirra litlu, sem hér fylgir með góðfúslegu leyfi. „Það eru ekki margar góðar myndir til af Sigurvin mínum,“ segir Hugrún.
Á mynd nr. 2 er frétt sem birtist í DV þar sem greint er frá slysinu og því þrekvirki sem Hugrún vann. Hún ýmist gekk eða skreið móti illviðri og á glerhálku inn að Kleifum til að leita hjálpar, um fimm til sex kílómetra leið, en neyddist til að skilja litlu stúlkurnar eftir í bílflakinu, því að ekki var neitt annað skjól að fá. Smellið á myndina til að fá frásögnina í læsilega stærð.
Sjá einnig:
► 25.05.2013 Yngsti Reykhólabúinn og margvísleg ættatengsl