Tillögur um sölu á kirkjum í Reykhólahreppi
Reykhólakirkja og Gufudalskirkja eru meðal þeirra tuttugu og tveggja kirkna sem Viðskiptaráð Íslands vill að íslenska ríkið selji. Allar eru þessar kirkjur á landsbyggðinni, flestar á norðvesturhluta landsins, þar af sex á Vestfjörðum. Ein þeirra er kirkjan á Hrafnseyri, sem er reyndar ekki í eigu eða umsjá ríkisins, heldur safnaðarins, og hefur svo verið í liðlega 106 ár.
Meðal annarra kirkna sem ráðið vill að ríkið selji eru Þingvallakirkja, Hóladómkirkja (sem byggð var úr tilhöggnu grjóti úr fjallinu Hólabyrðu á árunum 1757-1763), og kirkjan í Gröf á Höfðaströnd, sem er að stofni frá 1680.
Kirkjurnar eru aðeins örlítill hluti þeirra fasteigna sem Viðskiptaráð vill að ríkið selji. Að mestum hluta er þar um að ræða húsnæði ýmissa ríkisstofnana, svo sem skrifstofuhúsnæði, skóla, lögreglustöðvar, heilsugæslustöðvar (þar á meðal er Heilsugæslustöðin í Búðardal) og sitthvað fleira. Viðskiptaráð segir, að núverandi tilhögun á eignarhaldi sé „í ósamræmi við markmið nýrrar ríkisstjórnar“.
Í tillögum og greinargerð Viðskiptaráðs Íslands segir, að ríkið sé „tvöfalt umsvifameira á fasteignamarkaði“ en stærsta fasteignafélag landsins í einkarekstri og „svipað í umsvifum og stóru fasteignafélögin þrjú til samans“. Fram kemur, að samtals eigi ríkissjóður 880 þúsund fermetra af húsnæði. „Einungis 100 þúsund fermetrar ættu alfarið að vera áfram í eigu ríkisins vegna sögu- eða menningarlegra sjónarmiða eða óhentugleika við sölu.“ Meðal húsa sem ráðið leggur til að ekki verði seld er Alþingishúsið.
„Það húsnæði sem ríkissjóður á er afar fjölbreytt. Þyngst vegur húsnæði sem hýsir starfsemi mennta- og heilbrigðiskerfisins, en í eignasafni ríkissjóðs eru fleiri tegundir húsnæðis veigamiklar, til dæmis skrifstofuhúsnæði, íbúðarhúsnæði, sérhæft atvinnuhúsnæði, sögufræg hús og geymslur. Þá má einnig finna smærri flokka húsnæðis, líkt og fasteignir sem tengjast flugvöllum, lögreglustöðvum, fangelsum, kirkjum og innviðum (t.d. vitar og raforkutengd mannvirki).“
Kirknakortið sem hér fylgir birtist í Morgunblaðinu í fyrradag með frétt af þessu máli.
Úttekt og tillögur Viðskiptaráðs Íslands (25. janúar 2017).