Frá appelsínugula svæðinu á Reykhólum á Reykhóladögum 2010.

Reykhóladagarnir 2011 hefjast annað kvöld, fimmtudagskvöld, með sýningu gamalla kvikmynda (heimildamynda) úr Breiðafjarðareyjum. Undirbúningur daganna af ýmsu tagi stendur ennþá sem hæst og vill umsjónarhópur þessarar viðamestu byggðarhátíðar í Reykhólahreppi hingað til minna fólk á að fara að huga að skreytingunum. Hægt er að kaupa borða og blöðrur í réttum litum á upplýsingamiðstöðinni. „Svo er bara að nota hugmyndaflugið“, segir Harpa Eiríksdóttir, einn af skipuleggjendum.

Litaskreytingar verða eins og í fyrra. Sveitabyggðin í Reykhólahreppi fær rauða litinn, á Reykhólum fær Reykjabraut öll og Hellisbraut austur að Grettiströð appelsínugulan lit og Hellisbraut frá Grettiströð upp að Hólakaupum fjólubláan.

Fólk er minnt á að skrá sig í síma 894 1011 í Flateyjarsiglinguna og á borðhaldið og kvöldskemmtunina. Takmarkaður sætafjöldi er í siglinguna og á kvöldskemmtunina. Frestur til að skrá sig á skemmtunina rennur út á hádegi á föstudag svo að hægt sé að tryggja í tíma að nægur matur verði fyrir alla. Á sama tíma er stórt ættarmót á efri hæð Reykhólaskóla svo það er eins gott að vera viss um að nóg sé af öllu fyrir alla á þessu laugardagskvöldi.

Fólk getur nálgast dagskrá Reykhóladaganna með því að smella hérna eða í reitnum Tilkynningar hér neðst til hægri, á upplýsingamiðstöðinni, í Hólakaupum og í Grettislaug, sem og á Facebook-síðu Reykhóladaganna.

Þeir sveitungar sem vilja bjóða heim í súpu á föstudag eða laugardag eru beðnir um að hafa samband við Hörpu í síma 894 1011 til að fá súpumál og skeiðar.

Sem allra flestir eru hvattir til að skella sér á kven- og karlskörungakeppnina og taka þátt í henni. Flott verðlaun í boði fyrir sigurvegarana.

Sjá einnig :

27.07.2011  Ýmsar ábendingar varðandi Reykhóladagana 2011

28.08.2010  Litskrúðugir Reykhóladagar