Öllum er frjálst að hirða sér skógarplöntur á nýja vegarstæðinu á Skálanesi í Reykhólahreppi enda yrðu þær ella jarðýtum að bráð. Að þessu verður að vinda bráðan bug því að verktakinn getur komið til starfa hvern daginn sem er. Að sögn Hallgríms Jónssonar á Skálanesi er hér um nokkurt svæði að ræða þar sem mest er um birkitré ættuð úr Bæjarstaðaskógi í Öræfum, mörg um einn metri á hæð. Kannski einhverjar fleiri tegundir líka og vissulega töluvert af víði sem mætti hirða. Þessi gróður er utan í barði og verktakinn ætlar að byrja á því að ýta þar burt jarðveginum til að sjá hvernig klöppin er undir.

 

Í dag ætla foreldrar og forráðamenn nemenda Leikskólans Hólabæjar og Reykhólaskóla að fara á svæðið með kerrur og skóflur og taka plöntur sem börnin munu síðan gróðursetja. Bjarkalundur hefur þegar fengið nokkuð af trjáplöntum til prýði hjá sér.

 

Fólk sem vill hirða sér trjáplöntur hafi samband við Hallgrím á Skálanesi þannig að hann geti vísað á rétta staðinn. Gemsinn hjá honum er 846 4830 og heimasíminn 434 7857.

 

Bæjarstaðaskógur í Morsárdal skammt frá Skaftafelli í Öræfum er einhver þróttmesti birkiskógur hérlendis með allt að 12 m háum trjám, sem eru beinvaxnari en gerist yfirleitt með íslenskt birki.