Ungmennasamband Dalamanna og Norður-Breiðfirðinga (UDN) gekkst fyrir Hólafjöri á Reykhólum á föstudag og laugardag. Markmiðið með Hólafjöri er að gefa krökkum á sambandssvæðinu færi á samveru og samvinnu og tóku 34 krakkar þátt í fjörinu að þessu sinni. Komið var í Reykhólaskóla um miðjan dag á föstudag og heimferð var sólarhring síðar. Margt var brallað á þessum tíma sem leið þó afar fljótt. Hrefna Hugós hjúkrunarfræðingur kom í heimsókn og ræddi við krakkana um samskipti kynjanna, Egill Sigurgeirsson hjálpaði til við þrautakeppni í sundlauginni á föstudagskvöld og svo var diskó og bæði teflt og spilað fram eftir nóttu. Allir gistu síðan á heimavistinni og í kennslustofu. Reykhólahreppur lánaði aðstöðuna í skólanum.

 

Laugardagurinn byrjaði með morgunmat um hálftíuleytið og svo tóku við kynningar á blásturshljóðfærum sem Eygló og Björn Kristjánsbörn sáu um. Það var hrikalega skemmtilegt og ýmis torkennileg hljóð framkölluð. Dalli kynnti verklag við að tálga tré. Þar ríkti meiri ró en ótrúlegt var hvað krakkarnir náðu þó að búa til á svona stuttri kynningu.

 

Eftir hádegi fóru hóparnir á kajaka í sundlauginni og í hópleiki með Gunna Guðmunds. Eiríkur og Kolfinna og Rebekka og Stjáni lánuðu kajakana sína og Kolfinna var með Eygló í lauginni að leyfa krökkunum að finna hvernig er að róa. Þau fengu að vísu kulda og töluverðan vind en létu það ekkert á sig fá og reru eins og herforingjar og hvolfdu víst öll einhvern tíma en allir skemmtu sér konunglega.

 

„Í heildina var þetta allt mjög skemmtilegt og yndislegir krakkar sem tóku þátt í þessu með okkur. Að sjálfsögðu voru svo foreldrar sem hjálpuðu til við akstur, umsjón og matreiðslu og þess háttar. Í lokin voru svo þreyttir en ánægðir krakkar sem héldu heim á leið og allir með bros á vör“, segir Eygló Kristjánsdóttir, formaður Ungmennafélagsins Aftureldingar í Reykhólahreppi, ein þeirra sem báru hitann og þungann af Hólafjörinu.

 

Smellið á myndirnar til að stækka þær.

 

Ungmennasamband Dalamanna og Norður-Breiðfirðinga