Frá Hólmavík / Jón Halldórsson.

Leikhópurinn Kva1urinn & dvergarnir sjö, leiklistarval 8.-10. bekkja Grunnskólans á Hólmavík, hafa sett upp leikritið Útskriftarferðina eftir Björk Jakobsdóttur í leikstjórn Estherar Aspar Valdimarsdóttur. Jafnframt hafa Ungmennahúsið Fjósið og Leikfélag Hólmavíkur sett upp leikritið Hlauptu, týnstu! eftir Berg Ebba í leikstjórn Jóns Jónssonar og Eiríks Valdimarssonar. Lokasýningin á leikjunum tveimur á Hólmavík verður í Félagsheimilinu á fimmtudag, 7. maí, og hefst kl. 20.

Leikritin voru samin fyrir verkefnið Þjóðleik á vegum Þjóðleikhússins.

Miðaverð er 1.500 krónur. Posi verður á staðnum og óþarfi að panta á undan sér.

Leikritin verða síðan flutt um næstu helgi (9. og 10. maí) á Þjóðleikshátíðinni í Edinborgarhúsinu á Ísafirði.

Addið okkur á snapchat: utskrift segir einn af leikstjórunum, Eiríkur Valdimarsson, umsjónarmaður dreifnáms FNV á Hólmavík, sem sendi Reykhólavefnum þessa tilkynningu.

Myndinni sem hér fylgir var hnuplað af vef myndasmiðsins ágæta og ötula, Jóns Halldórssonar á Hólmavík.