Um 600 kg eftir fyrsta daginn
Einn af þeim meira en sex hundruð strandveiðibátum sem þustu á sjó núna í suðvestanáttinni þegar leyfilegt var er Darri BA 76, eini báturinn í því kerfi í Reykhólahreppi. Hann er gerður út frá Staðarhöfn á Reykjanesi og skipverjar eru nafnarnir og frændurnir Þórður Jónsson í Árbæ og Þórður Sveinbjörnsson úr Svefneyjum. Frekar var fiskurinn tregur en samt náðu þeir um 600 kg eftir daginn. Veðrið á þessum slóðum var með besta móti og voru þeir aðeins um klukkutíma og korter að „svífa til baka“ heim í Staðarhöfn frá Stykkishólmi, þaðan sem þeir leggja aflann upp.
Assgotans glannar eru þetta, segir Ása í Árbæ, eiginkona Þórðar skipstjóra, en hún tók í kvöld myndirnar sem hér fylgja.
Fréttamenn á landsvísu spurðust fyrir um það hjá umsjónarmanni Reykhólavefjarins hvort báturinn Krummi sem sökk við Látrabjarg í gærkvöldi hafi verið frá Reykhólum. Svo er ekki, en eðlilegt er að spurt sé. Bátur Þórðar í Árbæ til skamms tíma var Krummi, en hann var seldur til Hólmavíkur (og fór landleiðina) og nafnið fylgdi. Þetta var ekki sá bátur. Nýi báturinn sem Þórður í Árbæ keypti ber sem fyrr segir heitið Darri og hann er sá sem hér um ræðir.