Um 850 ljósmyndir - ómetanlegar fyrir héraðið
Árni Geirsson vélaverkfræðingur hefur á liðnum árum tekið mikinn fjölda ljósmynda í Reykhólahéraði og sett á Netið undir safnheitinu Myndir úr Reykhólasveit. Í langflestum tilvikum eru þetta myndir teknar úr lofti en líka eru þar myndir teknar á jörðu niðri (í Flatey á liðnu sumri og í réttum í haust). Loftmyndirnar hefur Árni bæði tekið fljúgandi sjálfur á mótorsvifvæng og með myndavélinni á flugi einni síns liðs.
Margoft hafa myndir Árna Geirssonar verið notaðar með fréttum hér á vef Reykhólahrepps, ýmist óskornar eða þá klipptar í samræmi við fréttina hverju sinni.
Ljósmyndir Árna úr héraðinu er að finna hér á vefnum undir Ljósmyndir, myndasöfn - Ýmis myndasöfn - Myndir úr Reykhólasveit. Þar eru núna tólf möppur með samtals um 850 ljósmyndum teknum á árunum 2006-2012.
Til þess að minna á þessar ómetanlegu myndir Árna Geirssonar hafa hér verið valdar fimmtán myndir teknar yfir Reykhólum haustið 2010, auk tveggja frá Kinnarstaðarétt í haust og einnar sem tekin var á gönguferð í Flatey í sumar. Í myndasafninu frá Kinnarstöðum er fjöldi skemmtilegra mynda af bæði fólki og fé.
Ef smellt er á tenglana hér fyrir neðan koma myndirnar upp í fullri stærð - ef smellt er á myndirnar sjálfar stækka þær gríðarlega. Til að skoða einstaka hluta myndanna og telja kannski laufblöðin á runnunum í Reykhólaþorpi þarf því að færa þær á skjánum bæði upp og niður og til hliðanna.
Að öðru leyti skal einfaldlega vísað á inn á áðurnefndan myndavef Árna (Ljósmyndir, myndasöfn í valmyndinni vinstra megin). Þar segir myndasmiðurinn: Hér eru nokkur söfn mynda úr Reykhólasveit. Þær má nota að vild til að vekja athygli á náttúrufegurð sem þar er að finna.
Myndirnar sem um var rætt:
► 01 ÁG
► 02 ÁG
► 03 ÁG
► 04 ÁG
► 05 ÁG
► 06 ÁG
► 07 ÁG
► 08 ÁG
► 09 ÁG
► 10 ÁG
► 11 ÁG
► 12 ÁG
► 13 ÁG
► 14 ÁG
► 15 ÁG
► 16 ÁG
► 17 ÁG
► 18 ÁG
Vorið 2008 birtist hér á vef Reykhólahrepps dálítið spjall við Árna undir fyrirsögninni Frjáls eins og fuglinn yfir Reykhólasveit.