Notendur þessa vefjar skulu minntir á fundargerðir hreppsnefndar Reykhólahrepps og undirnefnda hans, sem settar eru inn í dálkinn Fundargerðir neðst til vinstri jafnskjótt og þær berast. Á fundi hreppsnefndar í gær voru liðlega þrjátíu mál tekin til meðferðar, þar á meðal afgreiðslur undirnefnda sveitarfélagsins til staðfestingar eða synjunar. Samþykkt var að ganga til samninga við Stekkjarlund ehf. (Bjarkalund) um ferðaþjónustu í Reykhólaskóla í sumar. Tvö tilboð bárust og klofnaði hreppsnefnd í afstöðu sinni til þessa máls.

 

Ein af bókunum fundarins í gær var á þessa leið: „Hreppsnefnd vill þakka velferðarráðherra og ríkisstjórn fyrir að standa vörð um Dvalarheimilið Barmahlíð og þar með standa vörð um samfélagið í heild sinni.“

 

Hafnað var beiðni um frekari kynningu funda og fundargerða en tíðkast hefur enda teljist slíkt birt og afhent samkvæmt óskum með fullnægjandi hætti.

 

Greint var frá starfslokum Ingibjargar Þór aðalbókara að eigin ósk og henni þökkuð vel unnin störf.

 

Endurtekið skal það sem birt var neðst í „hreindýrafrétt“ hér á vefnum fyrir nokkrum dögum og var síðan að hluta áréttað efnislega á fundi hreppsnefndar í gær:

 

„Afgreiðslur sérnefnda sveitarfélaga öðlast ekki gildi fyrr en hreppsnefnd eða bæjarstjórn hefur staðfest þær. Reglulegir fundir hreppsnefnda og bæjarstjórna eru að jafnaði öllum opnir til áheyrnar. Ef um sérstök persónuleg trúnaðarmál er að ræða er fundum lokað á meðan þau eru rædd og afgreidd.“

 

Í dálkinum Fundargerðir neðst til vinstri má smella á síðustu fimm fundargerðirnar sem settar hafa verið inn á vefinn. Ef smellt er á Meira þar fyrir neðan birtist listi yfir allar nefndir og þegar smellt er á einhverja þeirra kemur listi yfir fundargerðir mörg ár aftur í tímann.