„Umsóknin mín er farin með póstinum“
Embætti sóknarprests í Reykhólaprestakalli hefur verið auglýst laust til umsóknar. Sr. Elína Hrund Kristjánsdóttir hefur þjónað sóknunum sex í prestakallinu í þrjú og hálft ár, upphaflega í afleysingum fyrir sr. Sjöfn Þór. Sjöfn ákvað hins vegar að segja starfi sínu lausu eftir barneignarorlof og hefur Elína þjónað í hennar stað lausráðin síðan. Sr. Agnes M. Sigurðardóttir prófastur hefur skipað valnefnd sem mun meta umsækjendur. Skipunartími prestsins verður til fimm ára frá 1. júní. Ekki verður um prestskosningar að ræða eins og áður tíðkaðist heldur skipar biskup í embættið að fengnu áliti valnefndar.
„Köllun frá söfnuði“ eins og það er nefnt hefur borist biskupi frá formönnum sóknarnefndanna sex í prestakallinu, þar sem farið er fram á að Elína verði fastráðin. Í ljósi þess að hún sótti um embættið þegar hún var lausráðin til starfa í upphafi töldu formennirnir ástæðulaust að auglýsa embættið aftur. Hjá því verður hins vegar ekki komist þar sem slíkt er ótvíræð lagaskylda.
„Mér hefur liðið mjög vel hérna á Reykhólum og í Reykhólaprestakalli þessi ár sem ég hef verið hér. Það hefur vissulega háð mér í starfi að aðeins hefur verið um afleysingu að ræða. Í fyrstu var það allt í lagi því að þá var ég aðeins ráðin í 14 mánuði. Nú hafa þessir 14 mánuði teygst í 43 mánuði ef mér telst rétt til og hefur ráðning mín ýmist verið framlengd um sex mánuði eða eins og síðasta árið aðeins um tvo mánuði í senn. Það sér hver manneskja að erfitt er að skipuleggja kirkjustarf nokkuð fram í tímann þegar staðan er þannig,“ segir sr. Elína Hrund í spjalli við Reykhólavefinn.
„Ósk mín er sú að ég fái fimm ára skipun í vor. Umsóknin mín er farin með póstinum. Hér vil ég vera hjá mínu góða fólki og halda áfram að byggja upp blómlegt kirkjustarf. Börnin eru dugleg í sunnudagaskólanum, að minnsta kosti hér á Reykhólum, og einnig hef ég reynt að halda uppi kirkjuskóla í Saurbænum. Alltaf mætir reytingur af fólki til messu. Fólkið á Dvalarheimilinu Barmahlíð er mér kært. Ég hef lært margt á þessum tíma og fólkið hjálpaði mér mikið þegar ég kom hingað, konunni sem aldrei hafði búið fyrir ofan Elliðaár fyrr en hún flutti í sveitina þar sem henni finnst hún núna eiga heima,“ segir sr. Elína Hrund og brosir.
Sr. Elína nefnir kirkjukórinn sérstaklega. „Þetta frábæra fólk á þakkir skildar fyrir sitt ómetanlega starf. Ég held að það sé leitun að eins fórnfúsu og bóngóðu fólki, kirkjustarfið væri mun fátækara ef þeirra nyti ekki við. Organistamálin í okkar litlu söfnuðum eru svo kafli út af fyrir sig. Þar erum við svo heppin að hafa aðgang að honum Viðari, organista Hólmavíkurkirkju, og hann er sko betri en enginn.“
Fjórar af sóknunum sex í Reykhólaprestakalli eru í Reykhólahreppi, þ.e. Flateyjarsókn, Garpsdalssókn, Gufudalssókn og Reykhólasókn. Tvær eru í Dalabyggð, þ.e. Skarðssókn á Skarðsströnd og Staðarhólssókn í Saurbæ. Sóknirnar í Múlasveitinni gömlu eru hins vegar orðnar mannauðar fyrir löngu nema yfir sumarið.
Myndin var tekin fyrir kirkjudyrum á Skálmarnesmúla í Múlasveit í Austur-Barðastrandarsýslu eftir messu sumarið 2009. Lengst til hægri eru sr. Elína Hrund og biskup Íslands, herra Karl Sigurbjörnsson. Alltaf er messað einu sinni á ári á Skálmarnesmúla, á laugardegi í júnímánuði. Myndin var meðal þeirra sem birtust með frásögn biskups í ferðablaði Vestfjarða árið 2010 þar sem hann greinir frá vísitasíum á Vestfjörðum fyrr og síðar undir fyrirsögninni Há fjöll og helgir staðir. Ferðablaðið má lesa hér á pdf-formi.
► Elína Hrund kemur til starfa í Reykhólaprestakalli (25. október 2008)
► Organisti með alvarlega bíla- og véladellu (23. febrúar 2012)