Fundur skipulags-, bygginga-, húsnæðis- og hafnarnefndar Reykhólahrepps í gær var með líflegasta móti hvað afgreiðslu umsókna um byggingalóðir varðar. Samþykkt var umsókn Trésmiðjunnar Akurs ehf. á Akranesi um lóðirnar nr. 5 og 7 við Hólatröð vegna byggingar parhúss. Jón Árni Sigurðsson á Reykhólum (Gullsteinn ehf.) fær iðnaðarlóðina að Suðurbraut 3 (milli verkstæðishúss Guðlaugs Theodórssonar og húss Björgunarsveitarinnar Heimamanna). Ísland, hvar er þín fornaldarfrægð ehf. í Reykjavík fær lóð á fyrirhuguðu verslunar- og þjónustusvæði rétt neðan við Langavatn (sjá reit V3 á meðfylgjandi korti - smellið á til að stækka). Samþykkt var umsókn Áhugamannafélags um bátasafn Breiðafjarðar um lóð við Reykhólahöfn.

Allt er þetta að venju með fyrirvara um staðfestingu hreppsnefndar (á fundi hennar á fimmtudag, sjá dagskrána í dálkinum Tilkynningar neðst til hægri).

Auk þess sem hér hefur verið talið voru samþykkt byggingarleyfi á Mávavatni á Reykhólum og Grænagarði í Flatey.

Fundargerð skipulagsnefndar er að finna í dálkinum Fundargerðir neðst til vinstri.