Börnin á leikskólanum Hólabæ á Reykhólum skruppu núna einn daginn í heimsókn að Hellisbraut 8 þar sem tímabundið hefur fjölgað í heimili. Þar eru nú auk kjarnafjölskyldunnar búsettir þrír undanvilltir grágæsarungar sem fundust í dúnleit og dæturnar á heimilinu tóku í fóstur, þær Solveig Rúna, Borghildur Birna og Hildigunnur Sigrún, en foreldrarnir Kolfinna Ýr og Eiríkur aðstoða eftir þörfum. Hugmyndin er að ala ungana þar til þeir verða orðnir nógu stórir til að bjarga sér sjálfir og sleppa þeim þá.

 

„Hjá okkur lifa þeir aðalega á fíflum, grasi og sandi og við gefum þeim vatn“, segir Kolfinna Ýr. „Borghildur bauð leikskólanum að koma og skoða gæsarungana sína og sagði öllum að þeir borðuðu „fífl“. Einn gæsarunginn er vanskapaður þannig að höfuðið hallar út á hægri hliðina eða eins og það komi í vinkilbeygju. Borga hafði nú alveg skýringu á því: „Hausinn hefur sennilega dottið af og einhver sett hann vitlaust á og þess vegna er hann með höfuðið á öxlunum.“

 

Hildigunnur sem er 18 mánaða hefur mjög gaman af ungunum og er mikið með þeim úti í garði. Það kemur svo oftast í verkahring Solveigar Rúnu að smala þeim heim úr öðrum görðum. Fyrst settum við þá inn á nóttunni en höfðum þá í búri á daginn. Nú eru þeir lausir úti en hafa skjól af brúsa með peru í sem þeir koma alltaf í á kvöldin, merkilegt nokk.“

 

Meðfylgjandi myndir voru teknar þegar leikskólakrakkarnir komu í heimsókn. Smellið á myndirnar til að stækka þær.