Hér er lesið af miklum áhuga.

Dugnaður nemenda í 1. og 2. bekk er með ólíkindum. Ég hef varla haft undan að útvega þeim ný verkefni í vetur, hvort sem það er í íslensku eða stærðfræði. Ekki líður sá dagur að ekki komi nemandi til mín og tilkynni mér að annað hvort vanti hann nýja lestrarbók eða nýja stærðfræðibók heim. Í vetur eru nemendur mínir búnir að lesa a.m.k. 110-120 bækur samanlagt, ýmist heima eða í skólanum. Þarna er ekki verið að telja þær sögubækur og blöð sem lesin eru í frjálsum lestri heima eða í skólanum. Reyndar er þetta afskaplega ánægjulegt verkefni og ég er lánsöm að fá að kenna svona duglegum krökkum, takk fyrir mig krakkar.

Þetta segir Steinunn Ólafía Rasmus á vef Reykhólaskóla. Þar fylgja fleiri myndir sem eru til vitnis um áhuga nemendanna á lestri og lestrartengdum verkefnum. Meira hér.

Minnt skal á árshátíð Reykhólaskóla í kvöld, þar sem allir eru velkomnir.