Um síðustu helgi kepptu lið Fjölbrautaskóla Vesturlands á Akranesi og lið Menntaskólans við Hamrahlíð í Morfís, mælsku- og rökræðukeppni framhaldsskólanna. Svo vill til að mikill meirihluti þeirra sem þátt tóku í keppninni fyrir hönd FVA með einum eða öðrum hætti var héðan úr Reykhólasveit. Fulltrúar FVA í Morfísliðinu sjálfu voru Hekla Karen Steinarsdóttir, Litlu-Grund, Helga Haraldsdóttir, Sælingsdalstungu, og Jón Axel Axelsson, Akranesi. Liðsstjóri hópsins var Olga Þórunn Gústafsdóttir, Reykhólum. Fundarstjóri var Sigurdís Egilsdóttir, Mávavatni, og tímavörður Hrefna Karlsdóttir, Kambi.

 

Meðal viðstaddra var Ásta Sjöfn Kristjánsdóttir á Litlu-Grund. Þó að FVA hafi lotið í lægra haldi segir Ásta Sjöfn að krakkarnir allir hafi staðið sig frábærlega. „Ég var mjög stolt að vera gestur á þessari keppni“, segir hún.