Svanhildur, Ásta Ragnheiður og Sólrún.

Húsakynnin í Iðnó eru hlýleg og gamaldags.

Ásta Ragnheiður afhendir Svanhildi og Sólrúnu styrkinn.

Konurnar sem hæstu styrkina fengu ásamt ráðherra.

Svanhildur Sigurðardóttir og Sólrún Sverrisdóttir.

« 1 af 5 »

Eins og hér var greint frá eru þaraböð á Reykhólum meðal þeirra viðskiptahugmynda sem fá úthlutað úr sjóði félagsmálaráðuneytis til atvinnumála kvenna að þessu sinni. Verkefnið sem ber heitið „Úr brimi í bað" fær 1,5 milljónir króna og er eitt þeirra fimm sem hæstu styrkina hljóta. Að hugmyndinni og útfærslu hennar standa þær Svanhildur Sigurðardóttir og Sólrún Sverrisdóttir á Reykhólum. Styrkurinn er veittur til markaðssetningar og kynningarmála.

Með því að koma upp þaraböðum á Reykhólum er ætlun þeirra Sólrúnar og Svanhildar að auka fjölbreytni atvinnulífsins í sveitarfélaginu. Lækningamáttur hafsins gæða hefur lítt verið nýttur hérlendis en á Reykhólum er ein af þremur stærstu þörungaverksmiðjum í Evrópu.

Viðskiptahugmyndin byggist á styrkleikum Reykhóla, heita vatnsins og þarans, en böðin verða unnin úr náttúruafurðum verksmiðjunnar. Erlendar rannsóknir sýna að þarinn hefur slakandi áhrif á líkama og sál og jákvæð áhrif á húðsjúkdóma, blóðþrýsting, sykursýki, gigt og sitthvað fleira.

Enn fleiri tækifæri liggja í fjölbreyttri heilsutengdri þjónustu á Reykhólum í framtíðinni. Hugmyndin er að bjóða upp á fleiri tegundir heilsubaða, svo sem leirböð, sjóböð og gufuböð, slökun og hvíld, heilun og nudd, heilsutengda veitingaþjónustu með áherslu á hráefni af svæðinu og fleira. Ætlunin er að gera Reykhóla að nýju heilsurjóðri framtíðarinnar með áframhaldandi uppbyggingu þar sem náttúran, ferðaþjónustan og lækningar sameina afl sitt.

Þaraböðin munu tengjast þjónustuneti sem eykur afþreyingarmöguleika fyrir ferðafólk. Má þar nefna meðal annars gönguferðir og hestaferðir, fuglaskoðun, hvalaskoðun, veiði, sjósund, heimsóknir á söguslóðir, námskeiðahald o.s.frv. Markmiðið er að lengja dvalartíma aðkomufólks á Vestfjörðum og virkja á umhverfisvænan hátt vatn, jarðvarma og náttúru landsins til atvinnusköpunar og bættrar heilsu Íslendinga jafnt sem erlendra gesta sem sækja landið heim.

Myndirnar tók Óskar Steingrímsson þegar Ásta Ragnheiður Jóhannesdóttir félagsmálaráðherra afhenti hæstu styrkina við hátíðlega athöfn í Iðnó í fyrradag.