Ólína Kristín Jónsdóttir, Kristján Gauti Karlsson og Guðjón Dalkvist Gunnarsson.

Lið Reykhólahrepps og Reykjavíkurborgar keppa í annarri umferð Útsvars í Sjónvarpinu annað kvöld, föstudag, og hefst leikurinn kl. 20. Þarna er um að ræða fámennasta sveitarfélagið í keppninni og það fjölmennasta (270 íbúar á móti 122.000). Hvað víðerni snertir er Reykhólahreppur hins vegar miklu stærri (1.090 ferkílómetrar á móti 273). Hvorugt ætti þó að skipta máli þegar inn á völlinn er komið.

Lið Reykhólahrepps skipa (í stafrófsröð) Guðjón Dalkvist Gunnarsson á Reykhólum, Kristján Gauti Karlsson á Kambi og Ólína Kristín Jónsdóttir frá Mýrartungu.

„Það eru allir velkomnir í sal, mæting í útvarpshúsið við Efstaleiti klukkan hálfátta. Endilega mætið ef þið getið og hvetjið okkur áfram, það er keppni milli litla og stóra,“ segir Ólína Kristín.

Ekki kemur fram í þessum ummælum hennar hver sá litli er og hver sá stóri.