23. september 2011 |
Vakning um endurbyggingu húsa í Vesturbyggð
Reisugildi öðru sinni að Aðalstræti 50 á Patreksfirði (í fyrra sinn árið 1925).
„Mikil vakning hefur orðið í Vesturbyggð um endurbyggingu gamalla húsa“, segir Magnús Ólafs Hansson atvinnuráðgjafi á Patreksfirði. Í dag er reisugildi vegna Stúkuhússins við Aðalstræti 50 á Patreksfirði, sem byggt var árið 1925 en er nú í eigu Freys Héðinssonar og Steinunnar Finnbogadóttur. Í sumar byrjuðu Hjalti Hafþórsson og Ingibjörg Birna Erlingsdóttir á Reykhólum á endurbyggingu hússins Hóla við Mikladalsveg á Patreksfirði eins og hér var greint frá ásamt myndum og jafnframt eru a.m.k. fimm hús í endurbyggingu á Bíldudal.
Stúkuhúsið á Patreksfirði ber það nafn vegna þess að Stórstúka Góðtemplarareglunnar á Íslandi átti það á sínum tíma. Stefnt er að því að þar verði kaffihús.
Myndirnar af og úr Stúkuhúsinu tók Magnús Ólafs Hansson.