Bjarki Stefán Jónsson á Gróustöðum í Gilsfirði, varaslökkviliðsstjóri Reykhólahrepps, hefur nú verið símasambandslaus í vikutíma vegna bilunar hjá Símanum eða Mílu. Málið er alltaf í athugun, að sagt er, en ekkert gerist. Ekkert. Þarna er um heimasímann að ræða en gsm-samband á Gróustöðum er afar slæmt og gloppótt. Stundum er hægt að nota gsm-síma með því að fara á ákveðinn stað úti á hlaði eða út í tiltekinn glugga en stundum dugar það ekki einu sinni til.

 

Slökkvilið Reykhólahrepps er fámennt og sérlega óheppilegt að ekki skuli vera nokkur leið að hringja í varaslökkviliðsstjórann. Hluta af þessum tíma hefur slökkviliðsstjórinn verið víðsfjarri í sumarfríi.

 

Þá eru ótalin þau persónulegu óþægindi að öðru leyti sem fylgja langvarandi símasambandsleysi.

 

Varla er hægt að ætlast til þess að (vara)slökkviliðsstjórinn sé á vakt nótt og dag á ákveðnum bletti úti á hlaði eða hangandi í tilteknum glugga í þeirri von að gsm-sambandið væri inni þá stundina sem útkall bærist.