Slysavarnafélagið Landsbjörg brýnir fyrir fólki að kynna sér allar leiðbeiningar sem fylgja flugeldavörum og nota bæði hanska og flugeldagleraugu þegar skotið er upp, segir í tilkynningu frá félaginu. Mörg alvarleg slys hafa orðið vegna flugelda á liðnum árum og mörg þeirra vegna þess að hlífðargleraugu hafa ekki verið notuð. Lögreglan minnir jafnframt á nokkur atriði úr reglugerð um skotelda. Þar segir meðal annars að á því tímabili sem almenn notkun skotelda er leyfð, frá 28. desember til 6. janúar, er meðferð þeirra þó alltaf bönnuð frá miðnætti til kl. 9 að morgni, að nýársnótt undanskilinni.

Þá er einnig minnt á, að óheimilt er að breyta á nokkurn hátt skoteldi þannig að hann hljóti aðra eiginleika en framleiðandi hans ætlaðist til.

 

„Við brennu og í næsta nágrenni við hana er öll meðferð flugelda og annarra skotelda sem hætta stafar af vegna ferils þeirra eftir tendrun bönnuð. Þar er aðeins leyfilegt að nota stjörnuljós og blys, þó ekki skotblys", segir þar ennfremur. Einnig ítrekar lögreglan hvatningu til allra að nota þar til gerð hlífðargleraugu þegar flugeldar eru annars vegar.

 

Myndin sem hér fylgir er úr myndbandi Slysavarnafélagsins Landsbjargar um hættuna af flugeldum.