Ingileifur Jónsson ehf. átti lægsta tilboðið í nýlögn og endurlögn Vestfjarðavegar milli Eiðis í Vattarfirði og Þverár í Kjálkafirði. Fimm tilboð bárust og voru þau opnuð í dag. Um er að ræða tæplega 16 km langan veg auk brúa yfir mynni Mjóafjarðar inn af Kerlingarfirði og yfir Kjálkafjörð, sem er á vesturmörkum Reykhólahrepps. Langmestur hluti hins nýja vegar verður innan Reykhólahrepps. Vegna þverunar fjarðanna styttist leiðin um átta kílómetra. Ætlunin er að verkinu verði að fullu lokið haustið 2015.

Tilboð Ingileifs Jónssonar ehf. hljóðaði upp á tæplega 2.154 milljónir króna, tilboð Suðurverks hf. var tæplega 2.487 milljónir, Ístak hf. kom næst með tæplega 3.187 milljónir króna, ÍAV hf. bauð ríflega 3.191 milljónir og Jáverk hf./Hagtak hf. bauð nærri 3.716 milljónir króna.

Þetta kemur fram á vef Vegagerðarinnar.

Þess má geta, að Ingileifur verktaki annaðist lagningu vegarins um Þröskulda (Arnkötludalsvegar), svo og sextán kílómetra vegarkafla milli Vatnsfjarðar og Kjálkafjarðar.

► Nánar um þessa framkvæmd (Reykhólavefurinn 18. febrúar 2012)

Viðbót: Frétt Stöðvar 2 (kvöldfréttir 27. mars)