« 1 af 8 »

Uppsetning hinnar langþráðu vefmyndavélar Arnarsetursins tafðist verulega frá því sem áformað var. Núna er hún komin í gang og hefur verið prufukeyrð í dag og myndin frá henni send þráðlaust í land í tengingu til bráðabirgða. Þegar tæknimenn hafa lokið verkinu á allra næstu dögum, jafnvel á morgun, verður útsendingin frá henni „sett í loftið" hér á Reykhólavefnum. Myndavélin er við hreiður með einum unga og má þar fylgjast með daglegu lífi litlu fjölskyldunnar í beinni – sannkallað raunveruleikasjónvarp. Hreiður þetta er einhvers staðar í óteljandi hólmum og eyjum Breiðafjarðar en ekki er heimilt að gefa upp staðinn öllu nánar.

Stundum er annað hjónanna á verði rétt hjá laupnum á meðan unginn kúrir en stundum eru þau bæði fjarverandi. Öðru hverju rís unginn upp og bröltir upp á hreiðurbarmana og skimar í kringum sig út yfir heiminn stóra. Stundum ýfir hann sig allan og þenur og baðar út vængjunum sem hann kann ekki ennþá að nota. Þegar foreldrarnir koma með bráð í búið færist fjör í leikinn.

Hvað skyldi Persónuvernd annars segja um þessa innrás í einkalíf breiðfirskrar kjarnafjölskyldu þótt af fuglakyni sé? Hvar er friðhelgi heimilisins?

Kyrrmyndirnar sem hér fylgja (smellið á til að stækka) voru flestar teknar núna í kvöldverðinum sem hófst laust fyrir klukkan níu. Unginn var orðinn nokkuð órólegur og tvístígandi en allt í einu varð ljóst að nú var mamma eða pabbi loksins að koma með eitthvað að éta. Ungi litli rauk upp með látum og glennti upp ginið og andartaki síðar lenti annað foreldranna við hreiðrið. Síðan tóku bæði til matar síns af þeim krafti sem einkennir þennan öfluga ránfugl. Innan við tíu mínútum seinna var fullorðni fuglinn horfinn á braut á ný.

Viðbót:  Nokkrum mínútum síðar kom hitt foreldrið (að líkindum) með meira í gogginn ...