Haustlitahlaup Umf. Aftureldingar í Reykhólahreppi verður eftir tvær vikur eða 28. og 29. ágúst (föstudag og laugardag). Seinni dagurinn þegar komið er í mark á Reykhólum er hinn árvissi Reykhóladagur, þegar margt er til skemmtunar og afþreyingar á svæðinu fyrir unga jafnt sem gamla og alla þar á milli. Haustlitahlaupið var þreytt í fyrsta sinn um svipað leyti í fyrra, reyndar með óformlegum hætti. Þá hljóp ofurhlauparinn Gunnlaugur Júlíusson á tveimur dögum alla leiðina frá Flókalundi í Bjarkalund eða um 125 km en fjórir aðrir hlauparar hlupu hluta leiðarinnar. Núna verður allt með formlegri hætti og endamarkið verður á Reykhólum, þannig að heildarvegalengdin er rétt um 140 km. Ýmsir kostir eru í boði hvað vegalengdir varðar og jafnframt er fólki í sjálfsvald sett hvort það hleypur annan daginn eða báða.
 
Óvíða ef nokkurs staðar eru haustlitirnir ríkulegri eða fegurri en í Reykhólasveitinni. Ekki síst er Barmahlíðin innan við Reykhóla rómuð fyrir blómfegurð og litaskrúð. Um hana orti Jón Thoroddsen frá Reykhólum ljóðið sem hefst á orðunum Hlíðin mín fríða ... 

 
28. ágúst (föstudagur)

     > 70 km frá Flókalundi, ræsing áætluð kl. 12.00.

     > 42 km frá Flókalundi, ræsing áætluð kl. 16.00.

     > 21 km frá Flókalundi, ræsing áætluð kl. 18.00.

Skráning á www.hlaup.is

 

Hægt er að gista nokkuð miðsvæðis á tjaldstæðinu í Djúpadal en þar er einnig sundlaug.

 

29. ágúst (laugardagur - Reykhóladagurinn)

     > 70 km til Reykhóla, ræsing áætluð kl. 06.30.

     > 42 km til Reykhóla, ræsing áætluð kl. 10.30.

     > 21 km til Reykhóla, ræsing áætluð kl. 12.30.

Skráning á www.hlaup.is

     > Bjarkalundur - Reykhólar, um 15 km, ræsing kl. 12.00.

     > Skemmtiskokk, Miðhúsagrús - Reykhólar, 2,7 km, ræsing kl. 13.00.

Skráning á staðnum.

 

Gert er ráð fyrir að meginhluti þátttakenda ljúki hlaupinu á Reykhólum um kl. 14.30. Minnt skal á, að Grettislaug á Reykhólum er ein af bestu og snyrtilegustu sundlaugum landsins. Þar er gott að láta líða úr sér eftir sprettinn.

 
Þess má geta, að hlaupaleiðin liggur um einhverjar gróskumestu berjalendur hérlendis. Ekki síst eru horfur á því að aðalbláberin á svæðinu verði með allra ríkulegasta móti þetta haustið.
 

Allir fá viðurkenningu fyrir þátttökuna.

 

Nánari upplýsingar gefur Eygló Kristjánsdóttir, formaður Umf. Aftureldingar, í síma 861 6492.

 

Smellið á myndirnar til að stækka þær.

 

Sjá einnig:

02.09.2008  Gunnlaugur Júlíusson hljóp fyrsta haustlitahlaupið