Vegleg gjöf frá gömlum vinum til Barmahlíðar
Heiðurshjónin Anna Þórarinsdóttir og Haukur Steingrímsson hafa fært Hjúkrunar- og dvalarheimilinu Barmahlíð á Reykhólum veglega gjöf í tilefni af 90 ára afmæli þeirra hjóna í næstliðnum ágústmánuði.
Anna sem er fædd 23. ágúst 1925 ólst upp á Reykhólum, dóttir hjónanna Steinunnar Hjálmarsdóttur og fyrri manns hennar, Þórarins Árnasonar. Hún er e.t.v. best þekkt hér um slóðir sem systir Lilju á Grund og flestir sem eldri eru í héraðinu muna eftir henni við hlið systur sinnar í réttakaffinu í eldhúsinu á Grund.
Haukur maður Önnu er viku yngri en hún, fæddur 30. ágúst 1925. Hann er húsasmiður ættaður frá Blönduósi. Þau kynntust á Reykhólum þegar hann var hér við að reisa Tilraunastöðina ásamt fleirum árið 1946.
Þau hjónin hafa búið í Kópavoginum alla sína búskapartíð og komu upp fimm drengjum. Þeir Tómas, Steingrímur, Hjörtur, Sverrir og Einar hafa allir sótt mikið hingað vestur, fyrst sem ungir piltar til almennra sveitastarfa á Reykhólum og Grund en síðar til annarra starfa, t.d. reri Tómas hér á grásleppu um árabil. Núna koma þeir helst til sækja sveitina sína heim, tína ber á haustin og eru til afslöppunar í Reykhólabænum sem gegnir orðið hlutverki sumarbústaðar.
Anna segir að síðan hún flutti í Kópavoginn hafi hún komið vestur á hverju sumri nema árið 1950, sumarið þegar Steini fæddist, og síðan í sumar er leið, en núna er það heilsan sem er farin að setja strik í reikninginn.
„Ég sakna þess að komast ekki vestur,“ segir Anna eldhress í anda, „en þess í stað vildi ég láta eitthvað gott af mér leiða því mér er ákaflega hlýtt til minnar heimasveitar. Við hjónin urðum sammála um að þiggja ekki gjafir í tilefni afmælis okkar í sumar, heldur hafa frammi bauk til handa Barmahlíð.“
Skemmst er frá því að segja að um 100 þúsund krónur söfnuðust í baukinn og sá Áslaug B. Guttormsdóttir formaður Barmahlíðarnefndar um að kaupa vegleg Yamaha-hljómtæki með útvarpi og CD-spilara að andvirði 90 þúsund krónur. Tækin eru í hæsta gæðaflokki og var keypt með þeim snúra þannig að hægt er að tengja þau við tölvu, iPad og gsm-síma og hlusta þannig beint á efni, bæði tónlist og hljóðbækur. Einnig létu hjónin fylgja ríflega tuttugu CD-diska með ýmiss konar tónlist. Fyrir afganginn eða um 10 þúsund krónur keypti Áslaug síðan fimm þvottakörfur í tveimur stærðum fyrir þvottahús heimilisins.
Helgu Garðarsdóttur hjúkrunarforstjóra í Barmahlíð hefur verið færð gjöfin. Hún og Áslaug vilja koma á framfæri þakklæti sínu fyrir hönd Barmahlíðar fyrir þessa veglegu gjöf og hlýjuna sem henni fylgir.
Mynd nr. 2 er frá afhendingu gjafarinnar í Barmahlíð. Þar eru þær Helga Garðarsdóttir hjúkrunarforstjóri ásamt dóttur sinni, Evu Rakel Másdóttur, og Áslaug B. Guttormsdóttir, formaður Barmahlíðarnefndar.