Velunnarar komu færandi hendi á Dvalar- og hjúkrunarheimilið Barmahlíð á Reykhólum í gær eins og svo oft áður. Í forsvari fyrir gjöfunum var Lionsfólk í Reykhólahreppi með öflugum stuðningi Kvenfélagsins Kötlu í Reykhólahreppi. Hér er annars vegar um að ræða svokallað flutningshjálpartæki og hins vegar sjálfvirka loftknúna dýnu, sem breytir undirlaginu jafnt og þétt. Verðmætið nemur nokkrum hundruðum þúsunda.

 

Að sögn Karls Kristjánssonar á Kambi, formanns Lionsdeildarinnar, kom frumkvæðið að þessari gjöf frá Lionsfélaganum Ingvari Samúelssyni, sem jafnframt er kokkur í Barmahlíð og þekkir vel til mála á heimilinu. Afhendinguna önnuðust þau Karl Kristjánsson og Ásta Sjöfn Kristjánsdóttir á Litlu-Grund, formaður Kvenfélagsins Kötlu. Viðstödd afhendinguna voru Ingibjörg Birna Erlingsdóttir sveitarstjóri, en rekstur Barmahlíðar er í höndum Reykhólahrepps, og áðurnefndur Ingvar Samúelsson.

 

Flutningshjálpartækið sem líka er kallað „skutla“ er ætlað fólki sem getur staðið upprétt en ekki gengið langt. Það gefur fólki kost á því að standa sjálft, tilbúið til flutnings. Með því að taka virkan þátt í „hreyfiferlinu“ eykur það blóðflæði og liðleika og hefur jákvæð áhrif á öndun, meltingu og vöðvatónus, svo og sjálfsmynd fólksins. Tækið er fyrirferðarlítið og kemst um þröngar dyr.

 

Loftdýnan er ætluð sem fyrirbyggjandi vegna legusára eða sem meðferð við þeim. Hún er sjálfvirk og blæs upp til skiptis á mismunandi stöðum og breytir þannig stöðugt legu þeirra sem á henni liggja. Hún er mjög einföld í meðförum.

 

Fyrri myndin sem hér fylgir var tekin við afhendinguna í gær. Þar takast í hendur Ingibjörg Birna og Karl annars vegar og Ásta Sjöfn og Þuríður Stefánsdóttir forstöðumaður og hjúkrunarforstjóri Barmahlíðar hins vegar en Ingvar Samúelsson fylgist með. Dýnan liggur innpökkuð á flutningshjálpartækinu (skutlunni). Á seinni myndinni er dýnan eins og hún lítur út uppblásin (mynd af vefnum eirberg.is).

 

Hér á vefnum fastus.is má sjá myndasyrpu af notkun skutlunnar (pdf).