Sex vestfirsk verkefni fá á þessu ári styrki frá Ferðamálastofu vegna úrbóta á ferðamannastöðum. Langhæsta styrkinn af þessum sex og þann næsthæsta á landsvísu, þrjár millj. króna, hlýtur Framfarafélag Flateyjar til að bæta aðstöðu fyrir ferðafólk í eynni. Flatey er eins og mestur hluti Breiðafjarðareyja innan vébanda Reykhólahrepps. Alls var 28 styrkjum úthlutað að þessu sinni. Úthlutunin var kunngerð fyrir fáum dögum.

 

Aðrir styrkir til vestfirskra verkefna renna til endurbóta á aðstöðu við Hellulaug við Flókalund, til verkefnis í Reykjanesi við Ísafjarðardjúp, til heildarskipulags kringum Látrabjarg, til lagfæringa á ferðamannahringnum fyrir Svalvoga og yfir Hrafnseyrarheiði og til lagfæringa á aðstöðu ferðafólks í Hlöðuvík á Hornströndum.

 

Að auki má geta þess hér, vegna þess að það stendur Reykhólahreppi nærri, að Ólafsdalsfélaginu var veittur styrkur til gerðar fræðslustígs í Ólafsdal við Gilsfjörð. Reykhólahreppur er einn af stofnendum Ólafsdalsfélagsins.

 

Heildarupphæð sem sótt var um að þessu sinni var um 330 milljónir króna en til úthlutunar voru 33 milljónir eða einn tíundi af því sem sótt var um. „Umsóknir voru almennt mjög vel vandaðar og verkefnin áhugaverð. Því reyndist sérlega erfitt að velja á milli en sem sjá má var aðeins hægt að verða við broti af umsóknum“, segir á vef Ferðamálastofu.

 

Styrkjum vegna úrbóta á ferðamannastöðum hefur verið úthlutað árlega frá 1995. Á þessum tíma hefur Ferðamálastofa varið yfir 700 milljónum króna til framkvæmda á um 300 stöðum á landinu.

 

Sjá einnig:

Reykhólavefurinn 2008:  Reykhólahreppur meðal stofnenda Ólafsdalsfélagsins

Morgunblaðið 1988:  Flatey: Elsta og minnsta bókasafn á Íslandi endurreist

Vefur Ferðamálastofu

Vefur Framfarafélags Flateyjar
Eyjasigling á Reykhólum