Vegur um Teigsskóg: Rætt við landeigendur
Vegagerðin hefur sótt um framkvæmdaleyfi fyrir nýbyggingu vega í Gufudalssveit, en þar er um að ræða leið B sem liggur um Teigsskóg við norðanverðan Þorskafjörð. Vegarlagning um skóginn hefur verið umdeild. Kæra liggur fyrir gegn íslenska ríkinu og Vegagerðinni og verður aðalmeðferð í málinu í haust. Reykhólahreppur hefur tvisvar frestað afgreiðslu á erindi Vegagerðarinnar en hreppsnefnd ætlar að hitta landeigendur á morgun (föstudag) og heyra þeirra sjónarmið. Óskar Steingrímsson sveitarstjóri segist þó reikna með því að framkvæmdaleyfi verði veitt og í framhaldinu verði hægt að bjóða verkið út.
Styr hefur staðið um þá ákvörðun samgönguráðuneytisins, að við þverun Djúpafjarðar og Gufufjarðar muni vegurinn liggja út með Þorskafirði að vestanverðu í gegnum Teigsskóg, sem mun vera mesti birkiskógur á Vestfjarðakjálkanum.
Fylgjendur þess að önnur leið yrði valin en í gegnum skóginn bentu á, að hann njóti sérstöðu á Vestfjörðum og landinu í heild. Fylgjendur leiðar B létu hins vegar orð falla eins og að „birkihríslur væru meira metnar en mannslíf". Eftir töluverðar deilur samþykkti þáverandi umhverfisráðherra að leið B yrði farin, þar sem vegarstæðið liggur um Teigsskóg.
Á meðfylgjandi mynd eru merktar þær þrjár leiðir (B, C og D) sem til álita komu í stað núverandi vegar (smellið á til að stækka). Á mynd nr. 2 er partur úr korti Landmælinga Íslands, þar sem örnefnið Teigsskógar (fleirtala) er merkt inn. Í öllum opinberum gögnum varðandi fyrirhugaða vegarlagningu er hins vegar talað um Teigsskóg í eintölu. Gott væri að heyra hvað staðkunnugt fólk í héraðinu hefur að segja um þetta. Líka er hægt að nota athugasemdakerfið hér fyrir neðan.
Hér fyrir neðan eru tenglar á pdf-skjöl (getur tekið nokkrar mínútur að hlaða inn) þar sem saman er kominn geysimikill fróðleikur um þetta mál.
- Mat á umhverfisáhrifum, september 2005
- Úrskurður Skipulagsstofnunar 28. febrúar 2006
- Úrskurður umhverfisráðherra 5. janúar 2007