Sú nýlunda er í ferðaþjónustu á Reykhólum í sumar, að hreppurinn leigði Hótel Bjarkalundi (Stekkjarlundi ehf.) aðstöðu í Reykhólaskóla og íþróttahúsinu á Reykhólum. Fram að þessu hefur hreppurinn sjálfur annast útleigu á aðstöðunni, einkum vegna ættamóta sem mjög vinsælt er að halda á Reykhólum. Fyrir þetta greiðir Bjarkalundur hreppnum kr. 775.000 í sumar. Fyrir utan svefnpokapláss og uppábúin rúm í skólanum og aðstöðu fyrir samkomur í íþróttahúsinu annast Bjarkalundur þjónustu við fólk sem býr í tjöldum eða húsbílum á túninu ofan við skólann. Á morgun, laugardag, verður síðan byrjað að selja veitingar í skólanum sem tilreiddar verða þar í eldhúsinu.

 

Allra fyrst verður þó nánast aðeins um að ræða hamborgara, samlokur og drykki. Að sögn Kolbrúnar Pálsdóttur í Bjarkalundi verður úrvalið meira þegar ferðamannastraumurinn að Reykhólum eykst (vonandi) með skárri sumartíð en verið hefur fram undir þetta.

 

Í samningnum kemur fram, að tilgangur hans sé að skapa grundvöll til þess að gera enn betur en áður í þjónustu við hinn almenna ferðamann sem á leið um Reykhólahrepp.

 

Á myndinni sem tekin var þegar samningurinn var staðfestur er Ingibjörg Birna Erlingsdóttir sveitarstjóri ásamt hótelstjórunum Árna Sigurpálssyni og Kolbrúnu Pálsdóttur.