Verður þetta svona í sumar?
Jón Þórðarson, ferðafrömuður og athafnamaður á Bíldudal og stjórnarmaður í Ferðamálasamtökum Vestfjarða, er harðorður um ástandið á Litlanesi í Kjálkafirði vestast í Reykhólahreppi í samtali við fréttavefinn bb.is á Ísafirði í gær. Hann segir áætlanir framleiðenda og dagskrá ferðaþjóna ganga úr skorðum og vill að Vegagerðin komi með lausnir á vandanum til lengri og skemmri tíma. Þetta mál snertir vissulega ekki einungis Vesturbyggð og Tálknafjarðarhrepp heldur einnig Reykhólasveit og ferðaþjónustu í héraðinu.
Þegar vegurinn í Kjálkafirði er meira og minna lokaður og ekkert vitað um framhaldið (öðru hverju fyrirvaralausar lokanir þegar rignir), þá er óhjákvæmilegt að fólk sem annars legði leið sína um Reykhólasveit velji aðrar leiðir. Þar má nefna leiðina um Hrútafjörð og Steingrímsfjarðarheiði, leiðina um Þröskulda eða Breiðafjarðarferjuna Baldur.
Jón Þórðarson segir í viðtalinu m.a.:
„Er hönnun vegarins þannig að þarna verði áframhaldandi skriðuhætta? Ég vil að íbúar verði upplýstir um hvað er verið að gera í málinu. Við fáum ekkert að vita nema að vegurinn verði ótryggur í óákveðinn tíma. Það þarf að upplýsa fyrirtæki og íbúa um hvernig ástandið verður, verður þetta svona í sumar?“
► Viðtalið við Jón Þórðarson í heild
► 24.05.2013 Vegstæðinu í Kjálkafirði breytt vegna skriðuhættu? (+ margir tenglar)