Séð yfir hluta Flateyjar á Breiðafirði. Myndina tók Árni Geirsson í júní 2012.

Umhverfisstofnun hefur nú hafið vinnu við gerð verndar- og stjórnunaráætlunar fyrir friðlandið í Flatey á Breiðafirði. Skipuð hefur verið samstarfsnefnd við gerð áætlunarinnar og í henni sitja Hákon Ásgeirsson, sérfræðingur Umhverfisstofnunar, Áslaug Berta Guttormsdóttir, Reykhólahreppi, Kristín Ingimarsdóttir, Framfarafélagi Flateyjar, og Hafsteinn Guðmundsson og Svanhildur Jónsdóttir, ábúendur í Flatey. Áætluninni er ætlað að fjalla um markmið verndunar svæðisins og hvernig standa skuli að viðhaldi verndargildis þess.

Þetta kemur fram í tilkynningu frá Umhverfisstofnun. Þar segir einnig:

Umhverfisstofnun hefur gefið út leiðbeiningar varðandi gerð verndar- og stjórnunaráætlunar, Stjórnun friðlýstra náttúruminja í umsjón Umhverfisstofnunar, sem hafðar verða til hliðsjónar við gerð áætlunarinnar. Lögð er áhersla á samráð og samstarf við hagsmunaaðila og er fólk hvatt til að kynna sér verkefnið og senda ábendingar og athugasemdir.

Ferlið verður opið og gagnsætt og verða helstu gögn varðandi áætlunina aðgengileg á heimasíðu Umhverfisstofnunar.

Sjá jafnframt:

► Friðlandið í Flatey (Umhverfisstofnun)

► Áslaug í samstarfsnefnd um friðlandið í Flatey (Reykhólavefurinn 22. ágúst 2015)