Vestfirðingar standi saman
„Atvinnuþróunarfélag Vestfjarða kemur nú fram undir nýju merki. Merkið er tákn fyrir þær breytingar sem hafa fylgt í kjölfar stefnumótunar félagsins, sem hófst snemma í vor. Starfsmenn og stjórn Atvest hafa unnið að gagnrýnni naflaskoðun, endurhugsað hlutverk og markmið félagsins og sameinast um nýja framtíðarsýn. Sveitarfélög, fyrirtæki og einstaklingar hafa tekið þessum breytingum vel og stutt þá hugsun sem þær tákna", segir Þorgeir Pálsson, frkvstj. Atvest, í grein hér á vefnum undir fyrirsögninni Breytingar!
Lokaorðin eru þessi: „Um leið og Atvest þakkar Vestfirðingum góðar og sérlega jákvæðar viðtökur við nýjum áherslum og breytingum, skorum við á Vestfirðinga, sveitarstjórnir, fyrirtæki og einstaklinga að standa saman í því verkefni að koma í veg fyrir að kreppan verði stærsta afsökun síðari tíma fyrir enn frekara svelti og aðgerðaleysi gagnvart atvinnu- og menningarlífi á Vestfjörðum!"
Grein Þorgeirs má lesa í heild undir Sjónarmið í valmyndinni hér vinstra megin á síðunni. Hið nýja merki (lógó) Atvinnuþróunarfélags Vestfjarða er á mynd nr. 2.