Halldór Halldórsson á Fjórðungsþingi Vestfirðinga á Reykhólum.

„Stefna sambandsins hefur í fjölda ára verið sú að styrkja sveitarfélög með frjálsri sameiningu og ég vildi bara benda á að Vestfirðir geta þetta alveg", segir Halldór Halldórsson, bæjarstjóri í Ísafjarðarbæ og formaður Sambands íslenskra sveitarfélaga í samtali við mbl.is. Í ávarpi sínu á Fjórðungsþingi Vestfirðinga á Reykhólum opnaði Halldór fyrir þá umræðu að Vestfirðir allir myndu sameinast í eitt sveitarfélag.

Kristján L. Möller, ráðherra sveitarstjórnarmála, hefur viðrað þá hugmynd að lögbundinn lágmarksfjöldi íbúa í sveitarfélögum verði þúsund manns en Ísafjarðarbær er eina sveitarfélagið á Vestfjörðum sem nær því marki. Halldór vill að Vestfirðingar taki frumkvæði um frjálsa sameiningu áður en til þvingunar kæmi.

„Við eigum ekki að festast í þeim gamla hugsunarhætti að allir þurfi að komast á bæjarskrifstofuna á hálftíma, heldur sjá sveitarfélög sem stjórnsýslueiningu sem gæti tekið við stórum verkefnum frá ríkinu. En í einingu sem er jafn landfræðilega stór og Vestfirðir þyrftu að sjálfsögðu að vera margir þjónustukjarnar", segir Halldór í samtali við mbl.is. Að mati hans yrði ótvíræður hagur að sameiningunni.