Komið var við á markaðinum í Nesi, þar sem Arnarsetur Íslands er líka til húsa.

Þá er sumarið brátt á enda og með hausti færist líf í starfsemi félagsins eftir sumarfrí. Félagsstarfinu lauk formlega í maí en 3. júní var farið í Heiðmörkina og gróðursettar plöntur og hlúð að trjánum. Það vakti athygli hve mikið af plöntum sem gróðursettar hafa verið síðustu ár hafa dafnað vel. Sumarferð Breiðfirðingafélagsins 2014 var farin að Árbliki í Dölum.

Flestir mættu á föstudeginum og var komið saman í húsinu um kvöldið. Þar var mikið spjallað og síðan léku Birgir Kristjánsson á harmonikku og Hilmar Knútsson á gítar. Á laugardeginum var ekið fyrir Gilsfjörð og fyrst stoppað í Ólafsdal og safnið skoðað. Þaðan var ekið í átt að Gróustöðum og drukkið kaffi í grasbala ofan við veginn. Síðan var farið í Króksfjarðarnes á handverkssýningu og sumir skoðuðu Arnarsetrið.

Þetta er meðal þess sem fram kemur í inngangsorðum Snæbjarnar Kristjánssonar formanns í nýútkomnu fréttabréfi Breiðfirðingafélagsins. Þar er jafnframt greint frá vetrardagskrá þessa öfluga átthagafélags.